Wonderlike naweek

Uiteindelik het die groot dag toe Saterdag aangebreek!

Ek het vroegoggend vir Bruidjie by die haarkapper gaan aflaai en manlief moes worstel met sy tante en niggie wat van Bloemfontein af gekom het…hulle geneem vir ontbyt en heeltyd geselskap gehou.Ek het my totaal onttrek van alle familieverpligtinge en net op Bruidjie gekonsentreer.Dit was ons oggend en ons ander meisiekind wat amper twee jaar in Moskou woon,was ook hier.Saam is ons drie toe in ‘n helse storm hier uit Benoni,Pretoria toe.Bruidjie se senuwees was klaar,want sy het juis ‘n Apriltroue gereel om in ‘n pragtige tuin te trou.

Dit het mooipraat en paai gekos om haar te kalmeer en positief te hou…twakstories van geseënde huwelike wat in kwaai reën plaasvind het haar nie juis laat beter voel nie! Aangekom by haar mooi tuin,was die weer darem minder dreigend,maar dik wolke het bly saampak.Teen twaalfuur moes ons besluit of dit binne of buite moet wees en BUITE het die oorhand gekry,na vele foonoproepe tussen Bruidjie en aanstaande manlief en nare ou skoonma (dis nou ekke) se onwelkome raad om dit maar binne te hou.

Dit was die regte roep,want teen vieruur was dit pragtig oopgetrek en onder lieflike blou lug en met die son wat deur die herfsblare loer,kon die seremonie begin.Bokant ons koppe het duiwe gekoer en daar was selfs wilde parkiete in die blaredak,wat saam gekwetter het om die atmosfeer verder besonders te maak.

Ek en manlief het ons meisiekind weerskante ingehaak en saam die paadjie afgestap en haar aan ons nuwe seun oorhandig.Die oumas en ouer tantes het blykbaar tissues volgehuil,omdat dit so aandoenlik was.Ek moes self konsentreer om nie in trane uit te bars nie!Wat dit verder besonders gemaak het,is dat ‘n vriendin van Bruidjie die seremonie waargeneem het.Dit was nou werklik besonders om na hierdie mooi jong dame se pragtige boodskap te  luister!

Die onthaal,die kos,die blomme,die geselskap…alles was net perfek.Ons kinders het dit ontsettend geniet en ek het ‘n pragtige seun bygekry.Ek wens net seun se ouers kon hierdie wonderlike dag saam met ons beleef en sien hoe gelukkig hul pragkind was!

 

Die tyd word min

Nog net ‘n week,dan breek die groot dag aan.My jongste gaan trou en alles wat gedoen moes word,is gedoen.Nou is dit net naels byt en hoop vir die beste.

Onwillekeurig dink ek terug aan my eie troudag.Dit was nog in die dae waar jou ouers alles gereël en betaal het en jy rustig of onrustig alles aanvaar het.Daar was nie allerhande simpel goed soos: “wedding planners,venues,repititions,bridesmaids, bestmen,trial menu’s ens.nie! Ek skryf dit aspris in Engels,want dit is die terminologie wat met hierdie moderne feestelikhede saamgaan.

Ek kan net my kop skud oor al die gekkigheid wat uitgedink word.Daar is selfs “Wedding Expo’s” met allerhande dinge wat daar uitgestal word.Daar is juis die naweek een in die Dome in Roodepoort.Ek gaan uit beginsel nie na sulke goed nie,want allerhande behoeftes word by die maklik verleibare en misleibare publiek geskep.Dis hoe dit werk..jy dink naderhand iets moet so en so geskied,anders dink mense jy bly agter ‘n klip!

Dis naels,hare en grimering en spesiale pakette vir moeder en bruid….R30000…alles ingesluit! .Dankie,maar nee dankie,ek doen my eie hare op my gewone manier en niemand plak dik lae grimering op my gesig nie.Ek doen niks aan myself wat ek nie gewoonlik sou doen nie en ek gebruik liewer daardie verskriklike klomp geld vir iets noodsaakliks! Dan is daar nog “trial menu’s”waar jy teen duisend rand ‘n kop,die kos kan proe!Dis net absoluut verspot hoe gek alles raak en die geld wat gemaak word beloop duisende rande.Dis ongelooflik dat daar steeds mense is,wat daarvoor val.

Hoe dit ookal sy,ons het alles so eenvoudig as moontlik probeer hou,maar dis ook by ‘n “venue”.(aaklige woord,waarvoor ek my vreeslik vererg).Ons hoop nou maar daar is nie wurms in die kos nie en dat die weer hou en dat my haartjies nie te plat op my kop vasplak,wanneer ek ‘n warm gloed kry nie! Gelukkig is dit die bruid se dag en ek sal maar net terugsink in herinnering aan my eie troudag…raai maar self hoeveel jaar gelede!