Die poort na suksesvolle regstellende inkopies

Die skuifdeur waardeur 'n klip gegooi is.
Die skuifdeur waardeur ‘n klip gegooi is.

Vandag voel alles darem weer normaal.Hierdie hoofstuk is nou verby,ons gaan aan met ons lewe,ry môre terug huis toe en dan moet ons maar nuwe selfone aanskaf.

Die verlies wat ons gely het was ongeveer R60000, saam met die herstelkoste,hersien van alarmstelsel en ons kollega se verlies.

Ek hoop die ou wat my selfoon vir ‘n appel en ‘n ei koop,sukkel sy gat af om die foon te werk.Die deler is so goed soos die steler!

Perdeby is wéér die blixem in want

vanaand toe ons tuiskom,na ‘n lekker uiteet,moes ons vaskyk in ‘n stukkende skuifdeur wat oopstaan.Binne in die slaapkamer lê ‘n reuse groot klip en die spoor van regstellende inkopies strek van daar af!

‘n Werkskollega wat vanaand by ons oorslaap se laptop met al sy werk op plus sy beursie met 3000 Pula is geneem.In ons kantoor is die verdere verlies,my en manlief se selfone,manlief se splinternuwe laptop,my kamera en duur lens,wat hy verlede jaar vir my present gegee het.Vreemd genoeg is geen iPads geneem nie.Almal s’n het oop en bloot daar gelê.

Die deure was gesluit,die vensters toe en die alarm was aan…wys buitekant met ‘n duidelik rooi lig,sodat skelms kan sien dis aan.Terwyl ons uitgeëet het,het die hele dorp se krag vir omtrent vyf minute afgegaan.Dis in hierdie tyd dat die blixems toegeslaan het.Die sekuriteitsmaatskappy sê dat die hele dorp se alarms tydens kragonderbrekings,by hulle afgaan en dan werk hulle van ‘n punt af om uit te vind waar probleme is.

Die helsems weet dit natuurlik,gooi gou ‘n venster stukkend en verkas vinnig met hul buit.Hulle moes gouspeel,want in die kombuis was my laptop,wat gelukkig nie in ‘n kerskous gaan beland nie en in ons slaapkamer was nog kameras en verkykers,’n GPS en satelietfoon.

Ek moet seker nou dankbaar wees dat ons nie rot en kaal gesteel is nie en ook nie aangerand is terwyl ons hier was nie.Ek is hoog die donner in!!Perdeby vloek nie graag nie,maar vanaand was dit Vrystaat en Moedertjie en donderweer wat oor my lippies getier het,asook ‘n paar wrede voorstelle wat met sulke uitvaagsels gedoen moet word.

Dis nou al baie laat,maar ek moes dit uit my sisteem kry.Sal môre ‘n foto plaas.

Ek sien nou dis my tweehonderdste pos!Ek sou liewer iets meer feesteliks wou blog,maar nouja….suggg…sal maar probeer slaap so tussen die adrenalienwalms deur.

Wind,winderig,winderigste!

Die afgelope drie dae waai hier ‘n woeste Oostewind en daarmee saam sandduine vol stof!Ons is toe gekokon in die huis met al die vensters dig,want buite tier die wind en speel die sonlig op die blink mica- stofdeeltjies,wat soos konfetti oral ronddwarrel.

Ons is al twee weke in Swakopmund en het twee uiterstes van temperature beleef…eers uiterste koue en dan sommer die volgende dag bloedige hitte.

Hierdie interessante weerverskynsel word deur die Namibiërs Oosweer genoem.Dit geskied meestal in die middel kan die winter.Wanneer ysige koue die binneland tref,sak dit af en beweeg vanaf die hoogland,kus se kant toe.Hoe verder die lug trek,hoe warmer word dit vanweë die wrywing.Dit skuur oor die woestyn en teen die tyd dat dit die kus bereik,is dit kokend warm en bring natuurlik massas stof ook saam.

Gister was die Duitse karnaval in die dorp en tussen die stof en hittewalms deur,het die spulletjie moedig met versierde vlotte die dorp op horings geneem.Oosweer is karnavaltyd.Die drankies vloei,die musiek speel,almal lag en kners maar geduldig op die sandkorrels tussen die tande!Daar was selfs ‘n steeks donkie in die parade.Hy het kort-kort vasgesteek en dan moes vele hande hom vorentoe stoot,want hy het eie-donkierig daarin geslaag om ‘n klomp keer die hele parade op te hou!

Walle stof by my voordeur.Dit help nie om te vee nie,want dan verstik jy boonop in jou eie stofstormpie
Walle stof by my voordeur.Dit help nie om te vee nie,want dan verstik jy boonop in jou eie stofstormpie
Gisteroggend kon mens amper nie die see sien nie.
Gisteroggend kon mens amper nie die see sien nie.

Brille raak dof van die stof en kameras bly liewer tuis.Die temperatuur styg tot hoog in die dertigs en net ‘n skuimende Tafelbier kan die dors behoorlik les.

Die voorspelling is dat die Oosweer nog tot Dinsdag ons metgesel is.Tot dan,sit ek knus in my kortbroek en plakkies vir ‘n branderlose see en kyk.Selfs die see se fut is uitgebaklei teen die nare Oostewind!

Woorde…

is die kern van ons bestaan.Sonder woorde sou ons nie hier in die virtuele ruimte met vreemdelinge kon gesels nie.Sonder woorde sou ons niks wees nie…geen boeke,geen geskrifte,geen loopbane,geen selfone,geen rekenaars,geen tegnologie,geen wetenskap…niks.

Sonder woorde is ons terug by ons oerouers,wat in grotte gewoon het en slegs met gebare en geluide gekommunikeer het.

Woorde maak reg,woorde kerf seer,woorde skaaf die nerwe dun,woorde troos,woorde ontketen woede,woorde stook oorloë,sagte woorde keer die grimmigheid weg,woorde asem liefde,woorde spoeg haat,woorde spreek deernis,woorde braak ongevoeligheid,woorde maak die mens ‘n unieke wese.

Aan almal wat hier lees..sonder woorde was hierdie ook net ‘n woordelose reuse windeier!

Om te bou in ‘n township

Ons woon definitief in twee wêrelde hier in SA.My getroue huishulp doen tans aanbouings by haar huis en ek volg elke stap met belangstelling.

Eerstens wil goeie swart bouers wat in wit gebiede bouwerk doen,nie in townships bou nie,dus is daar ‘n keuse tussen kansvatters of totale onkundiges.Let wel,ek is glad nie besig om hier enigsins rassisties te wees nie.Dit is harde feite.

Sy moes ook bouplanne indien en ‘n tekenaar het vir haar ‘n heel oulike plan opgetrek,wat hy namens haar by die munisipaliteit ingedien het.Daarvoor het hy vir haar R300 ekstra gevra en toe sy die planne gaan haal na goedkeuring,is sy ingelig dat dit nie soveel kos nie.Dus die tekenaar het haar geboor.

Tweedens kry sy ‘n “bouer” wat meer as ‘n week lank verdwyn het met haar bouplan…definitief dit gekopieer vir latere eie gebruik.Met ‘n groot gesukkel het sy dit uit hom uitgekry en ‘n ander bouer gekry.

Die ou doen toe nou nie ‘n te slegte joppie nie,maar die plek wat bousand moes aflewer,verneuk haar uit twee meter sand en toe sy hulle aanvat,laat lewer hulle vieslike sand af wat hulle gesubkontrakteer het by ‘n ander plek.Die eienares van die winkel se verskoning was dat hulle ‘n nuwe plek is en maar nog op die been probeer kom..is selfs baie eie met Leah en is o, so gaaf en belowe die son,maan en sterre!

Toe die inspekteur kom om die fondamente te bekyk,kom hulle agter dat die buurman twee meter van haar erf gevat het.By nadere ondersoek blyk dit buurman se buurman het weer twee meter van sy erf.Lang storie kort,sy gaan haar twee meter terugvat en die buurman se buurman se garage staan op sy twee meter!

Die bouer bou alles klaar,behalwe die dele tussen die dakkappe en die vensterbanke.Toe wil hy al sy geld he.Onse Leahtjie byt vas en sê dat sy tweeduisend Rand terughou totdat elke baksteen gelê en elke gat toegestop is.Elke kort-kort het hy ‘n storie dat hy ‘n begrafnis het of die een skuld of daai een moet betaal,maar Leitjies staan vas.

Hierdie vroutjie moet orals heen per taxi…nie net in ‘n kar spring en gou Builders’ toe of waar ookal heen nie.Ek het gelê soos ek lag toe sy vertel hoe sy ‘n bondel lang plastiekbuise,waarin die elektriese kragdrade gesit word,tussen die mense se voete in die taxi gedruk het.Die “queue master”moes haar help om die goed vloerlangs in te stoot en almal sit maar gelate,want dis hoe dinge vervoer word.

Die bouwerk staan einde se kant toe,die dak is op,dakteëls en al en hierdie dapper vroutjie het my uitgenooi vir ‘n koppie tee,wanneer sy die laaste stof uitgevee het en elke ding op sy plek is.

IMG_3785
‘n Huis is so ‘n tydelike ding…netsoos die lewe,vergaan dit ook met tyd.

Geveerdes

Ek hou vreeslik daarvan om na geveerdes te kyk.Vir my is hulle die sinnebeeld van vryheid en ondernemingsgees.Hulle pas aan by omstandighede.Waar die mens die omgewing verander het,maak hulle planne om te oorleef,hetsy met ‘n nes onder ‘n dak of bo-op ‘n nou vensterbank van ‘n wolkekrabber of selfs in ‘n hangende potplant.Die geveerdes wat oorleef is dié wat altyd planne maak!

 

Image