Ek gaan..

so vir twee weke laaglê.Sal vertel as ek terug is.Tot dan liewe blogvriende,lekker bly en vou julle maar toe in die warm komberse!

Advertisements

Ons lewens…

Verloop in raampies.

By geboorte is jy ‘n kale mensie met geen gedefinieerdheid nie.Soos tyd aanstap,ontwikkel jy ‘n raampie wat net jou eie is.Party mense waardeer wat hulle in die raampie sien,maar ander kyk met afguns daarna en is maar te bly as die raampie kraak of die foto verdof.

Sommige van ons ontwikkel groot rame om ons suksesvolle lewens daar te kan inpas.Hierdie rame kan soms op onbeskeie maniere in ander se kele afgedruk word.Partymaal is hierdie groot rame weer voorbeelde van beskeidenheid,nederigheid en dankbaarheid en beslis die moeite werd om teen jou lewensmuur te hang.

Soms val hierdie groot raam met ‘n slag van die muur af en die hele prentjie versplinter in duisend stukkies.Ons almal het al op so ‘n punt gekom en dis ‘n gelykmaker…geen raam is onbreekbaar nie.

Ons laaste raampie waarmee ons die lewe verlaat,is die raamwerk van ‘n kis en niemand,maar niemand kan hierdie raampie ontsnap nie…dus,geniet die raampie vol vreugde wat elke dag jou bied en waardeer die raampies van al jou vriende en geliefdes om jou!

Verdere Flippen Frustrerende Foonstories!

Punt nommer

14.Die dametjie sorteer alles mooi uit,stuur vir my E-pos met die swartlys nommer en ‘n bewys dat ek ‘n simswop gedoen het.

15.Die vreugdevure brand hoog omdat alles nou uitgesorteer is,maar manlief se skerp oë sien raak dat die rede vir ‘n ” simswop” was “non payment” i.p.v. “Stolen”! Wat sal ‘n versekeringsmaatskappy daarvan dink?

16.Weer bel,weer e-pos met die korrekte bewoording en alles is nou reg….

17.Wat!???Van gister af merk ek dat ek net noodnommers kan bel.Ek ontvang wel Whatsup,maar kan nêrens heen bel of oproepe ontvang nie.@&$?!!!!!!

18.Bel vandag vanaf landlyn na MTN winkel.Kry raad om battery en simkaart uit te haal of die simkaart in ‘n ander foon te toets.

19.Ek doen dit toe,met groot gesukkel en ‘n tweezer om daai piepklein kaartjie uit sy nessie te kry.

20.In die ander foon werk die kaart en daar is ontvangs…ou goedkoop klein Nokia wat alles kan doen wat ek nodig het….m.a.w. daar is fout met my splinternuwe opgegradeerde vervlakste veertiendae-oue vrekselse foon!

21.Ek sukkel my morsdood om die simkaart uit te kry en span naderhand ‘n naaldwerk “quick unpick” in,om agter die kaart in te kry en dit versigtig vorentoe te stoot…toe het ek alreeds oorweeg om die goedkoop Nokia te breek om die kosbare kaart te herwin!Gelukkig werk dit.

22.Bel weer MTN en moes nou afspraak maak met hul tegnikus om die foon na te gaan.

Ek is lus en slinger die ding in die yskoue swembad in en ek wens die weerlig tref die dief wat my soveel ellende besorg het!!

Perdeby is nou éérs die blixem in!

Flippen Frustrerende Foonstories!

1.Twee maande terug..BB val in vloerwaswater en MTN weier om eers te probeer om dit te laat regmaak.

2.Ek betaal vir nuwe selfoon,nadat hulle weier om my ‘n opgradering te gee,omdat dit een maand te vroeg is.Dit kos my ‘n aardige bedraggie,want ek koop toe ‘n goeie foon.

3.Die nuwe foon word gesteel tydens ‘n inbraak by ons huis in Namibië.

4.My seun laat die simkaart blok omdat dit makliker is in SA,maar hy kan dit nie laat “swartlys” nie,omdat ons dit persoonlik moet doen.

5.Die oomblik toe ons terug is in SA gaan ek en manlief na ons verskeie maatskappye vir nuwe fone en om die swartlys ding te doen..hy by Vodacom en ek by MTN.

6.Ek kry baie goeie diens en kon toe aanspraak maak op my opgradering.Toe moet ek ‘n ” simswop” doen wat my ‘n paar honderd Rand ekstra kos plus die ekstra op die nuwe foon,wat nie binne die opgradering val nie.

7.Die versekering eis nou ‘n nommer as bewys dat die foon op die swartlys is en ek tjoef weer MTN toe.

8.Lang gespook om die foon te laat swartlys.Ek moes vierkeer bel..dan is die persoon wat my gehelp het siek,dan het hoofkantoor nog niks laat weet nie en so karring dit aan.

9.Dis tien dae later sedert ek die eerste keer probeer het om my foon te swartlys.Intussen gebruik die dief my foon alte heerlik!

10.Vanoggend ry ek weer soontoe,slaggereed om hulle gas te gee.Die krag is af en al die personeel staan buite in die son..winkel gesluit!Donnerweer en bliksemstrale!!Twee ure later selfde storie.

11.Baie vies ry ek huis toe.Bel weer vanmiddag en word verseker die dametjie sal my binne vyf minute bel…hahahoho..twee ure later nog niks!

12.Ek bel weer en die vrou wat antwoord verseker my die ander dame werk aan die saak.Voor sy kan neersit,vertel ek baie liefies,met net ‘n klein sweempie sarkasme, my hele storie en dat Vodacom binne vyf minute my man kon help met swartlys en ‘n nommer as bewys netjies op papier uitgedruk.Sy sê toe sy sal die saak verder hanteer.

13.Sy bel my ‘n halfuur later en sê sy sal alles uitsorteer en epos.Dis punt nommer dertien…dalk is ek nou gelukkig!

Dwaasheid

Siende almal praat oor die koue,wil ek ook ‘n eiertjie daaroor lê. Ons huis is soos ‘n yskas en al skyn die son deur die vensters in party vertrekke,is hierdie oopplan,somergerigte woning,geen plesier in die winter nie.

Die hele week bibber ons en steek net ons neuse by die kamerdeur uit vir proviand en koffie…ek moet nou hier meld dat ons ‘n verwarmer onder die mat het en dis heerlik,veral as jy direk kruisbeen op die mat sit.Dan word mens se koue stert so saliglik warm en verkeer ek omtrent heeldag in hierdie mediterende posisie,met gevolglike nek- en rugspasmas.

Woensdag waag ek dit haarkapper toe en in ‘n onbesonne oomblik eis ek dat die knipster haar skêr goed deur my boskasie laat kou.Soos die hare vloer toe plons,wonder ek of ek dan nou my varkies kwyt is,maar ek knip nie ‘n oog nie.Na nog ‘n sarsie kleursel op die paar donse wat oor is,voel ek nog steeds onverskrokke en dapper…iets het net gefluister…”new look”..en aangesien ek deesdae worstel en wurg aan die oudword gedagte,besluit ek om iets te probeer wat my jeug sal terugwin!

Bwahahaa!Ek is die ene snawel en kabouter spitsoortjies en die hormoonvlekke op my gesig lyk soos sjokolade blertse.Die wolbaardjies agter my ore en onder my kinnebak, sprei uit soos spookasem op ‘n kerkbasaar.Die plooi tussen my oge,is dieper as die Visriviervallei en my kale nek,herinner aan dié van ‘n donskop volstruis.Onder my keel hang ‘n kloek,wat enige kalkoen rooi van jaloesie sal maak…ek is sommer lus en maak koeloe,koeloe koeloe,terwyl die nekvel so skud!

Sjoe,ek is uitgelewer sonder my hare en ergste van alles..my kop is yskoud.Ek het nooit besef hoe warm hare ‘n mens se kop hou nie en hoe dit “swakhede” kan kamoefleer nie!Nou weet ek hoekom manlief en ander bleskoppe in die winter na hulle “beanies”gryp.

Ydelheid en dwaasheid gaan hand aan hand!

 



 

 

My gunsteling sitplekkie..

is agter in die tuin.Dit was eers ‘n verwaarloosde hoekie waar al die tuingemors,los bakstene,kruiwaens en oorskiet teëls gebêre was.Op ‘n dag het ons net besluit dis ‘n seer oog en aangesien manlief se kantoortjie op die plek uitkyk,besluit ons om ‘n mooi hoekie agter die bosse te maak.Dis nou wel teen die tuinmuur,maar ‘n paar teëls teen die lelike betonmuur, het ‘n groot verskil gemaak.

Daarna is dit winkels toe vir ‘n mooi stelletjie en na ons eerste mislukte keuse van ‘n patetiese Made in Tjaaina,wat net ‘n maand gehou het,het ons op ‘n stewiger ook Made in Tjaaina afgekom.Dis huilenswaardig dat die mark so oorspoel is van swak gehalte produkte en dat mens omtrent niks anders kry nie,behalwe as jy bereid is om Krugerrande daarvoor te betaal nie.

Dit daar gelaat…ons Tjaaina stelletjie sit heerlik,die hoekie is lekker sonnig in die winter en ons drink soggens elfuur ons koffietjie agter die of is dit innie bos..?

image
Die poort deur die bos na ons geheime hoekie.
image
Manlief se kantoordeur doer agter.
image
Ons Tjaaina tafel en stoele.Lekker in die son en vol stof,want die koue het ons in die huis gehou.

 

Kliek op die fotos om dit groter te maak.Ek het hierdie met my Ipad geneem,dus is dit maar aardige foto’s,maar dit gee darem ‘n idee van hoe dit lyk.