Ek het hom!

Vandat ek so agtien jaar gelede begin voëls kyk het,was dit nog altyd my begeerte om ‘n visuil te sien.Ek het die afgelope tien dae die voorreg gehad om in die noordweste van Botswana na hierdie sku en uiters skaars uil,te gaan soek.Vir ‘n voëlkyker is dit gelykstaande aan die klim van Everest vir ‘n bergklimmer!

Dis ‘n baie groot uil,selfs groter as die reuse ooruil.Lengte is 61-63 cm.Hy spog met ‘n vlerkspan van 153 cm en kan tot 2,5kg weeg.Soos sy naam aandui,leef hy van vis.Hy jag snags van ‘n tak of oewerwal af,wat so een tot twee meter van die water af is en swiep af na die water soos ‘n visarend en vang die vis wat naby aan die oppervlak swem.

Die eerste tekens is die visskubbe en baberkopbeen onder ‘n groot boom!

Daar’s hy!Dis die kuiken.Gewoonlik word twee eiers gelê,maar net een kuiken oorleef en word groot.

Die volwassene is donkerkleuriger as die kuiken en die wyfie is groter as die mannetjie.Hier loer hy of sy met een oog na my en dis die beste wat ek kon regkry. Let op die ontsettende skerp kloue..geen vis staan ‘n kans hierteen nie!

Nog ‘n kuiken..hierdie is ‘n ander een op ‘n ander plek.Kuikens is 68-70 dae in die nes en daarna nog ten minste vier maande van die ouers afhanklik.

Hierdie pragvoëls is uiters bedreigd as gevolg van die vernietiging van hul habitat.Ek is so dankbaar dat ek hulle kon sien!