Op eensame geheime paaie..woestynreuse

Ons laaste dag  word ‘n woestynolifantdag.Ons sien ‘n hele trop in die Huabrivier,waarvan ek reeds foto’s geplaas het.

Hier volg nog ‘n paar:

IMG_2638
Ouderdom en swaarkry eis sy tol.
IMG_2610
‘n Intieme kykie in die mond.Olifante kry ses stelle tande in ‘n leeftyd en wanneer die laastes uitgeval het of stomp is,tree ‘n hongerdood in.
IMG_2678
Jong bul.
IMG_2668
Kronkelstert
IMG_2617
Waai met die ore om af te koel.
IMG_2664
Ou gehawende oor.

Op eensame geheime paaie deel 10

Dis ons laaste dag en niemand kon voorspel wat ‘n wonderlike dag dit sou uitdraai nie!

Eerstens ry ons weer na die Huabrivierbedding verby De-Riet,die Riemvasmakers se gehuggie.Later tref ons ‘n hele trop olifante aan en die dag ontaard in ‘n olifantdag!

IMG_0472
Toe ons November verlede jaar hier was,was die gebou nog verwaarloos.Wat ‘n verrassing om dit netjies opgeknap te vind!Dit moes weldoeners gewees het,want die mense hier is brandarm.
IMG_0100
Pragtige kwartsrif tussen ander modder- en rotslae.Party dae wens ek ek was ‘n geoloog,om al die werkinge van die aarde se klippe te verstaan!
IMG_2569
Wat ‘n voorreg om op hierdie paar dae oue woestynolifantjie af te kom!Sy mamma het hom heeltyd weggesteek en ons kon net hier en daar ‘n vinnige kykie na die outjie kry.
IMG_2588
Hy en mamma beweeg na die volgende bos en dis die meeste wat ons van die kleinding kon sien.
IMG_2650
Ons word egter beloon toe ‘n ouer kleinding vervaard agter sy ma aanhardloop.Die outjie het vreeslik getrompetter en klippe opgeskop.
IMG_2651
Gelukkig was my kamera reg vir aksie!
IMG_2621
Ons verwyl ‘n hele ruk tussen hierdie wonderlike diere.
IMG_2634
Ek kry maklike nabyskote.Hierdie is die agterpote van die linkerkantste olifant op die volgende foto.
IMG_2632
Hierdie twee ou tantes het so lank in die bos gestaan,dat ons nooit hul gesigte gesien het nie!
IMG_2704
Sommer net weer een van my visooglensfoto’s,om die barheid van die omgewing aan te dui.

Townshipstories 4

Die nuwe jaar breek aan en Surprise begin sy eerste skooljaar.Die mannetjie lyk te deftig in sy spierwit nuwe skoolhempie en grys langbroek.Sy gesiggie blink van opgewondenheid en in sy rugsak is ‘n splinternuwe kosblikkie met lekker toebroodjies,wat Gogo(ouma)vanoggend vir hom ingepak het.

Hy klou styf aan Gogo se hand terwyl hulle skool toe stap.Van oraloor swerm kinders soos miere by die skoolhek in.Sy ogies word al hoe groter,maar hy gooi manmoedig’n spierwit onseker glimlaggie vir sy ouma toe die onderwyseres hom wegneem.

Die eerste dag is verskriklik chaoties,want honderde kinders wat nie vroegtydig ingeskryf het nie,daag by die skool op…uniforms klaar gekoop.Al is daar nie plek vir ‘n muis nie,dwing die laatslapers dat hul bloedjies ingeneem word!Surprise verdwyn in die massa en die leerkragte spook om orde te handhaaf.

Intussen reël Gogo,dat ‘n taxibestuurder die volgende dag vir Surprise skool toe en terug vervoer.Die aand,kry sy nie veel uit die kind oor die eerste skooldag nie.Die outjie is redelik oorweldig en val pootuit in die bed.

Die tweede dag breek aan en laatmiddag na werk kom Gogo tuis en tref ‘n smerige Surprise aan.Sy spierwit skoolhemp is vol stof en die eens blink gepoetste skoene lyk of hy daarmee klippe geskop het.Sy gesig en hande is asvaal en die langbroek is stekelrig van die klitsgras!Sy probeer agterkom wat gebeur het,maar die mannetjie is kwaai ontwykend.

Die volgende oggend wag sy vir die taxibestuurder om by hom te hoor wat aangaan.Ewe verleë laat hy val,dat hy die kind by die verkeerde skool afgelaai het!Sy kry amper die piep en met moeite trek sy die storie uit Surprise uit.Hy het toe maar daar by die ander skool rondgehang.Niemand het eers agtergekom dat die kind verlore is nie.Dáár was dit net so chaoties en die oorweldigde personeel het nie eers die verdwaalde skapie raakgesien nie.

Die knapie het toe speel-speel huis toe gestap en natuurlik sy skoene en klere bevark in die proses.Tot vandag toe weet net hy waar hy gespeel het en hoe hy die pad huis toe gevind het!

NS. As jy dalk nie die verhaal voorheen gevolg het nie,lees Surprise se storie hier: https://perdebytjie.wordpress.com/2015/08/04/die-storie-begin-so/  en hier: https://perdebytjie.wordpress.com/2015/08/05/die-storie-gaan-verder/  en hier: https://perdebytjie.wordpress.com/2015/08/06/die-storie-gaan-nog-verder  en hier:https://perdebytjie.wordpress.com/2015/08/07/die-storie-gaan-nog-verder-en-verder-en/ en ten slotte hier:  https://perdebytjie.wordpress.com/2015/08/07/die-storie-eindig-so/

 

Townshipstories 3

Uiteindelik is haar huis klaar gebou.Die eerste reëns val en in die agterplaas dam die water verskriklik op teen die tuinmuur.By nadere ondersoek sien sy dat die dreineringsgat,wat volgens bouregulasies daar moet wees,toegestop is.Sy maak gou die gat oop en hoera!..die water stroom uit aan die anderkant bultaf reguit straat toe.

Met die volgende reënbui,styg die water so hoog op,dat sy bevrees is dat haar huisie gaan oorstroom.Met ‘n swart sak oor haar kop,trotseer sy die storm en probeer die gat oopmaak.Dis solied toegestop met ‘n bol sement!Nou is dit net wens dat die reën ophou,anders is alles onder water.

Later stap sy ewe gemoedelik oor na die buurvrou om die sakie van die verstopte gat uit te pluis.Buurvrou is suur en ongeskik en sê dat sy nie die water deur haar erf wil hê nie.Maak nie saak hoe sy probeer mooipraat en verduidelik nie.Die water loop nie naby buurvrou se huis nie,ook reg langs die muur straat toe.Dus word niemand benadeel nie.

Ê-êê wêna..die tante staan vas soos die bol sement wat sy in die gat gedruk het!Wat daarvan as ek op my eie koste ‘n pyp onder die grond insit aan jou kant,stel sy voor aan die mamma.Skielik gaan die antie ‘n groentetuin daar aanlê en die pyp gaan pla.Die laaste sewe jaar is daar nog nie eers ‘n grassprietjie op daai erf geplant nie!

Buurmama is onversetlik en stuur haar in haar peetjie in.Sy is woedend,maar niks help nie.Sy en die kinders probeer nou om met pik en graaf,die helling van haar erf anderkant toe te maak.Dis net so goed jy probeer ‘n berg verskuif.Sy gooi maar handdoek in en kou naels elke keer wanneer dit reën.

Gemene buurvrou plaas nou permanent haar oorvol stink asblik,wat altyd vêrweg onder ‘n boom gestaan het,reg langs die muur.Die stink walms van haar deksellose gemorsblik stoot elke dag in hulle huisie in.Die ou heks sit eers elke tweede week die vuilgoed uit vir die munisipale vragmotor.Intussen kan die vuilis lekker gis en borrel…alles jaloesie oor die nuutgeboude huis!

 

Townshipstories 2

Die Desembervakansie breek aan.Lang witwarm somerdae tril in die hittegolf wat Suid-Afrika vasklem.Sy en haar gesin sit luilekker op draadstoele in hul agterplaas.Dis te warm om veel te beweeg.Selfs die vlieë sirkel stadig in die rondte,of sit net vasgeplak op een plek.

Verbeel sy haar,of is daar ‘n klankie in die lug?Sy lig haar brandende gesig effens en snuif- snuif boontoe.Iets is beslis nie reg nie…kort-kort is daar ‘n walm wat die warm,dik somerlug omkarring.Nou ruik almal dit en een vir een vlug hulle binnetoe en begin vensters toemaak.

Baie keer is daar maar reuke,veral in so ‘n township waar mense onhigiënies saamgebondel is.Jy knyp maar neus toe en hoop die vlieë en brommers doen vinnig hulle werk.Dis nou waar hierdie pestilensies handig te pas kom…hulle ruim verrottende goed,baie gou op!

Die walm begin naderhand hard praat en dring deur elke krakie en gaatjie haar huis binne.Almal voel naar en proe selfs die walglike reuk agter in die keel.A-nee-a,so kan dit nie aangaan nie!Sy is reeds suspisieus dat die bron van kwaad,in die veld langs haar huis wegkruip.Sy loer oor die muur en ja-nee,nes sy gedink het..iemand het alweer onwettig sy vullissakke daar kom neergooi!

Dis ‘n ou storie,wat haar al baie kopseer veroorsaak het.Die munisipaliteit kom gereeld met ‘n groot vragmotor om daar skoon te maak.Daar is al selfs ‘n bordjie opgesit met dreigemente van boetes.Dié word sommer al die eerste week gesteel en dien iewers as stutpaal vir ‘n sinkmakoekoe.Dis nou nie asof daar nie weekliks vullisverwydering plaasvind nie en nogal gratis en verniet!

Teen dag twee is dit heeltemal ondraaglik en dit help nie eers meer om kerse te brand of iets te spuit nie.Pikswart wolke vlieë en brommers zzzzz die hele huis vol!Desembermaand is niemand beskikbaar om dienste te lewer nie en sy besluit om eiehandig die sakke te gaan optel en iewers vêr weg te gooi.

Sy en seunskind,gemasker met sakdoeke om hul monde,saag die veld in met ‘n kruiwa en graaf.Skok der skokke!Die sakke is vol velle,bene en stukke afvalvleis van geslagte beeste!Hulle steun en kreun en beur om die swaar liggaamsdele op die kruiwa te kry.Intussen sluk hulle swaar aan die naarheid wat in hul kele opstoot.

Uiteindelik slaag hulle daarin om een sak te lig en ‘n entjie verder te gaan gooi.Sy het dit nog oorweeg om die sak in haar asblik te stoor,maar die walglikheid van die vonds,laat daardie plan summier in die lug in opwalm.Die ander sak is so swaar,dat hulle gou besef dis ‘n onbegonne taak!

Vier weke lank asem hulle die geur van selfsugtige,onnadenkende,onopgevoede,selfgesentreerde mense se dade in!Die brommers en maaiers doen uiteindelik hulle werk klaar,maar dit was ‘n lang,ongeurige,verstikkende somer”vakansie”!

Op eensame geheime paaie deel 9

Na die piekniek ry ons met die hoofpad (goedgeskraapte gruispad) tot by Palmwag.Dis een van die min plekke waar mens brandstof kan kry en ons maak hier tenkvol.Die pompjoggie werk al jare hier en hy is altyd effe aangeklam.Ek neem hom nie kwalik nie,want dis ‘n dodelike warm bult waarop hy woon en sy lewe is bitter saai!

Twee jaar terug toe ons hier verby is,was daar darem nog ‘n boom.Nou het dit plek gemaak vir ‘n sinkafdakkie waar mense wag vir ‘n oplaai.Natuurlik steel ek ‘n paar foto’s van die toneeltjie in die bloedige middagson:

IMG_0399
Palmwag se petrolstasie…silwerskoon toilette links,mense wat wag vir wie weet wat,’n moedelose ou wat sit op ‘n stoel,’n satellietskottel,’n verfloiingde voëlnes wat onder die huisie se dak uitsteek en ‘n afgeleefde vragmotor in die agtergrond.
IMG_0400
Ek zoom in..daar is ‘n hond onder die bankie,’n kinderfietsie,’n emmer en ‘n beker met ‘n lepel in,’n groot klip links op die bankie.
IMG_2511
Nog nader…my lang lens vang die outjie besig met ‘n selfoon.’n Paar minute later dans hy dat die stof staan met musiek wat hy uit die foon optower!Sy bekertjie en lepel is nou mooi sigbaar.
IMG_2507
Die geboutjie staan langs die huisie met die satellietskottel.Blykbaar huisves dit die kragopwekker,maar vir my is dit ‘n siniese verwysing na die petroljoggie wat jaar in en jaar uit hier voortslaaf !Armbandjies en krale hang aan ‘n dwarslat wat op twee mikstokke rus.
IMG_2523
Naby Vrede draai ons in die Huabrivierbedding in.
IMG_0447
Laatmiddag slaan ons vir die laaste keer tent op.Reg voor ons tent is die geheimsinnige spore van ‘n woestynolifant.Ons weet hulle is naby,maar dit moet wag tot môre,want ons is poegaai!
IMG_0437
Ons kampplek op ‘n eensame vlakte.
IMG_2554
Ek speel bietjie met die visooglens ..vuurmaakplek links en tent regs.Dit gee die gevoel van ‘n verlate aardbol…en wás dit nou verlate!

 

Townshipstories

Die bouwerk aan haar huisie vorder goed.Dae lank leef sy en haar gesin met die oop gate waar vensterruite nog ingesit moet word.Daar is ook nog geen plafon nie en bedags bak die somerson die dak kokend warm.Binne is die temperatuur versmorend.

Een oggend word hulle al hoesende wakker met verstikkende rookdampe in hul longe.By nadere ondersoek besef sy dis die rook van ‘n konka,amper reg onder haar kamervenster.Sy sug van verligting,dat dit nie haar huis is wat in vlamme opgaan nie.Sy sien dis een van die townshipmammas,wat mielies gaarmaak vir die taxipassasiers,wat op die hoek wag vir ‘n geleentheid.

Eers laat sy dit daar,want sy reken dis ‘n eenmalige gebeurtenis.Soos die week egter vorder,word dit net al erger en haar parmantige suster konfronteer die konkamieliekokendemamma.Die fris tante plant uitdagend haar hande op dikke heupe en skel vir sussie tot by oom Daantjie in die kalwerhok!Suster is nie links nie en gou ontaard dit in ‘n woeste bekgeveg.

Die konkatante waggel later straataf en kom terug met drie groot Zoeloes aan haar flanke.Hulle loop en kneukels kraak en blink spiere rol en pof onder styfgespande t-hemde.Sy kry hoendervleis van vrees,want mens sukkel nie met ‘n Zoeloe nie,veral nie as jy ‘n Pedi is nie!

Teen haar verwagting in,luister die mans aandagtig na beide kante van die storie en kies sowaar haar en sussie se kant.Haar persepsie van Zoeloes,word net daar nek ingeslaan.

Druipstert vat dikmamma haar rokende konka en gaan maak die kontrepsie staan by haar eie huis….eishh!

Op eensame geheime paaie deel 8

Ons ry vroeg die volgende dag in ‘n pragtige vlakte.Dis bitter droog en daar is min gras.Tog is daar ‘n troppie springbokke wat die klein grassprietjies afvreet.Wanneer hierdie area reën gehad het is hier glo duisende diere en dit word ook die Klein Serengeti genoem,omdat dit lyk soos in die regte Serengeti in Tanzanië.

Voor ons in nog ‘n rivierbedding verdwyn,sien ons ‘n paar interessante dinge:

IMG_2396
Springbokke wat vrolik opspring!
IMG_2456
Pragtige knoetserige stam van ‘n ou Kameeldoringboom.
_MG_8300
Hierdie rivier het ontsettende hoë walle en die troppie springbokke loop tot waar hulle kan uitklim.Intussen soek hulle groenigheid hier.
IMG_2429
Heerlike verrassing..’n Olyfbyvreter!Dis ‘n eerste vir ons.Hierdie byvreter is ‘n intra-Afrika trekvoël wat broei in Noord Namibië en Angola en dan noordwaarts migreer in Afrika.
IMG_2455
Die rivierwal sorg vir pragtige strukture en krake.
IMG_2488
Donkie se kind skuil ook in die rivierbedding teen die genadelose son!
IMG_2493
Hartmann-bergsebra kon netsowel ‘n donkie gewees het!Hierdie sebra verskil van die bekende Bontsebra(Equus burcellii).Hy het geen skadustrepe,swart strepe gaan tot by die hoewe,’n duidelike roosterpatroon op sy kruis,strepe wat net tot bokant die maag strek,’n kenmerkende keelvel.Hulle kom veral in bergagtige gebiede en aangrensende vlaktes voor.
_MG_8303
Skielik maak die rivierbedding oop en ons is omring deur pragtige kranse.
IMG_0357
Ons beweeg uit die rivier en kom af op hierdie vrolike Himbas.Die ouer een wou van sy handgemaakte goedjies aan ons wys.Die sand was so warm,dat hy begin rondspring het soos ‘n kokkerot op ‘n warm plaat.Die jonge here wou hulle vrek lag en toe gryp hy die een aan sy oor.Dit was so ‘n pragtige oomblik,wat my altyd sal bybly!
_MG_8327
Skielik is daar water in die rivier en ons besluit dis tyd vir piekniek.
IMG_0365
Ons stop onder hierdie reuse ou Anaboom,langs die watertjie en smul aan kouevleis en harde brood.Onthou,ons was nou al vyf dae uit die beskawing!
IMG_0371
Perdeby maak eers gou voete nat voor sy om die piekniekboom verken.
IMG_0381
Teen die stam van die boom,kry ek hierdie doppies van goggas…heelwaarskynlik was dit ‘n stadium van metamorfose van sonbesies??Weet iemand dalk?
IMG_0378
Onder die boom vind ek die oorspronklikste hark wat ek nog ooit gesien het…seker een van die plaaslike bevolking s’n,wat gereeld daar rus,wanneer die vee water toe kom.

 

Op eensame geheime paaie deel 7

Nadat ons in die wonderlike fontein geswem het en lekker onder die bome uitgespan het,vat ons weer die langpad.Hierdie keer na ander geheime paaie.Die dae is vreeslik lank en ons ry maklik tien ure op ‘n dag,rustye ingesluit.Die son gaan eers agtuur onder en dan is daar nog tot halfnege genoeg lig.

IMG_2375
Langs die pad sien ons hierdie wilde warrelwind.
_MG_8270
Ons ry alweer teen ‘n woeste berghang uit en ek oorweeg dit amper om liewer agter die voertuig aan te loop!
_MG_8276
Gelukkig is die pad nou weer afdraand,maar klipperig!
IMG_0272
Wat hierdie erge pad die moeite werd maak,is hierdie pragtige bottelboom.Pachypodium lealii groei in rotsagtige gebiede en word medisinaal aangewend aan wonde en vir oorinfeksie.
IMG_2385
Selfs die honde kry swaar hier.Hierdie een het mank en kruppel,in die wasige hitte agter sy maat aangesukkel.
IMG_2382
Honde word nie baie respekvol behandel nie en moet self kos en water soek.Dit gee nuwe betekenis aan “lae hond” en dit breek my hart om te sien hoe hierdie diere mishandel word!
_MG_8283
Laatmiddag kom ons verby ‘n suiping en beeste,skape en bokke drom hier saam.
IMG_0285
Ons slaan kamp op tussen Mopaniebome op ‘n dor vlakte.
IMG_0281
Hierdie Himba veewagter kom op sy donkie verby en smeek ons vir bietjie water.
IMG_0283
Dankbaar galop hy in ‘n stofwolk weg die skemeraand in.
IMG_0330
Waar ons kamp,vind ek interessante dinge,soos hierdie bokspoorspinnekop (SEOTHYRA)se nes in die klipperige sand.Dit lyk soos die spoor van ‘n bok en hierdie spinnekoppe kom net in Suider-Afrika voor.
IMG_0327
Ons was ooggetuie van die dood van hierdie skerpioen.’n Massiewe swart skerpioen het hom gevang en gesteek.Ongelukkig het ek nie my kamera byderhand gehad nie en die volgende dag het ek die ongelukkige prooi netjies uitgelê en gefotografeer.Toevallig was daar ‘n klein springspinnekoppie ook op die toneel.Hierdie foto is spesiaal vir Sonel,ons spinnekopliefhebber!

Op eensame geheime paaie deel 6

Op die vierde dag ry ons na die dorpie Sesfontein.Dit is die hoofdorpie in die Kunene Distrik en het ‘n inwonertal van 7,358 mense.Daar is ses fonteine wat in die omgewing ontspring,vandaar die naam.

Dis ‘n baie klein dorpie en die hoofstraat lewer ‘n paar interessante plekke op:

IMG_0202
Haarkapper …Ys word oral verkoop,maar die gesoute toeris sal liewer nie hiervan gebruik maak nie.Katteskiet en hardloop is ‘n gegewe!
IMG_0201
Wrak van ‘n bakkie wat gerol het!
IMG_0211
Dit was op die middaghitte en die winkeltjie was gesluit.
IMG_0198
Die Sjinese is oral,maar in hierdie geval is dit ‘n plaaslike inwoner wat gedink het ,dat die naam aanloklik klink.
IMG_0212
Die kroeg was oop,maar nie ‘n enkele siel was in sig nie.Hopelik sink dit nie die besigheid nie!
IMG_0204
Die welbekende Fort Sesfontein is die spoggerigste gebou in die dorpie.Dis in 1896 deur die Duitsers gebou en het gedien as ‘n blyplek vir soldate wat veesiektes,onwettige jag en wapensmokkelary moes monitor.In 1914 het dit heeltemal verval,maar na honderd jaar is dit gerestoureer en dien dit as blyplek vir besoekers.
IMG_0214
Warmquelle is net ‘n entjie van Sesfontein af en hier draai mens af na een van die fonteine in die omgewing.
IMG_0255
Oppad na die fontein kom ons op hierdie Himbakindertjies af.Klippe  skrik geen kaalvoet- kindjie af nie!
IMG_0224
Langs die pad is hierdie opelug kindertuin.Onder die boom is klippe om te sit en dis DIT!
IMG_2332
Bokke drink water uit een van die fonteine wat sommer so uit die berg borrel.
IMG_0218
Nog steeds oppad na die fontein…Herero- vrouens met hul kleurvolle drag.Hereros en Himbas is dieselfde bevolkingsgroep.Die Hereros is verwesters terwyl die Himbas nog baie tradisioneel leef.
IMG_0226
Uiteindelik..die Ongongofontein!Teen hierdie tyd is ons moeg en warm en regtig vuil na vier dae sonder ‘n behoorlike was!
IMG_0231
Wat ‘n verrassing…helder water borrel uit die berg en dis so skoon,mens kan tot op die bodem sien.Daar is bietjie alge,maar niks gaan ons afskrik nie!
IMG_0242_edited-1
Perdeby maak lyf nat..klere en al!Die water is heerlik warm en dis die saligste gevoel om daar rond te dryf.Die klere was natuurlik binne ‘n halfuur droog.want dit was versengend warm.