Dis die klein dingetjies..

wat ons soms ontglip.As jy egter stil sit en rondkyk om jou,gebeur daar nogal baie.Ek het een middag net op die houtplatvormpie voor ons huisie gesit en die volgende waargeneem,sonder om ‘n voet te versit:

IMG_4292
Laaste blommetjies voor die ysige winterkoue.
IMG_7399
Wie sou kon dink dat ‘n nare plantjie soos ‘n dubbeltjie,so ‘n mooi blommetjie het.Toevallig was daar ‘n veertjie ook verstrengel in die ruwe blare.(Tribulis zeyheri).
IMG_4194
Met uitgerafelde toiingrige vlerkies,geniet sy die laaste strale van die skraal middagsonnetjie.
IMG_6741
Nog ‘n klein besoekertjie op my stoep,is liewe klein baardmannetjie.Dis ‘n piepklein voëltjie,slegs 10cm en weeg 9-13g.(Scaly-feathered Finch).
IMG_6745
Baardmannetjie se nes.Duidelik nie deur hom gebou nie…soms trek hulle in ander voëls se neste in.Hierdie lyk soos ‘n koringvoël se nes,maar die paartjie het dit oorgeneem!Hul eie nessies is rond met ‘n klein tonneluitgang.
IMG_4253
Sommer net verras deur hierdie pragtige wesentjie.
IMG_7515
Gemsbok Komkommer(Acanthosicyos naudinianus)
IMG_4205
Nog ‘n besoekie van die pragtige dame.
IMG_7510
Gemsbokkomkommer van naby.
IMG_4202
Hierdie mooi outjie was die toppunt van ‘n heerlike middag op ‘n stoepie in die Kgalagadi!

 

Stokkies..

die stokstertmeerkat staan vroegoggend kiertsregop en bekyk die omgewing vanaf die hopie grond net buite sy gaatjiehuisie.Die outjie moet eers die wêreld goed bespied,want nare jakkalse,katte van alle soorte en selfs die skerpklou gevleueldes van die lug,kan sy kersie vinnig snuit!

IMG_4472_edited-1
Terwyl hy sy pensie warm bak in die vroegoggend son,maak hy seker dat geen gevaar dreig nie.
IMG_4464_edited-1
Kyk eers regs….
IMG_4432_edited-1
Dan weer links…
IMG_4439_edited-2
Draai die lyfie honderd-en-tagtig grade regsom…die voetjies bly stewig geplant.
IMG_4433_edited-2
Dan weer honderd-en-tagtig grade links om.
IMG_4503_edited-1
Sussie Graatjie staan op die flanke en help vir Stokkies om vroegtydig gevaar te bespied.

Stokstertmeerkatte leef in groepe van 5 tot 40,maar gewoonlik 8 tot 15.Dis ‘n baie sosiale diertjie en eintlik is dit nie ‘n goeie idee om hom as troeteldier aan te hou nie.Leef hoofsaaklik van insekte en ander ongewerweldes,maar sal ook reptiele en voels eet.

Hul status is tans bedreigd in sekere areas,veral waar droogte heers en wanneer hulle opgemerk word,moet dit aangemeld word.Hulle is egter nie op die lys van erge bedreiging nie en kom steeds wyd verspreid voor in Suidelike Afrika.

Wat sien ek daar..?

Na ‘n wonderlike twee weke in die Kgalagadi-Oorgrenspark,is ek weer terug om  die wonder van daardie ongelooflike plek,met julle te deel.

Dis ‘n omgewing wat immer verander.Dis nooit dieselfde nie.Verlede jaar toe ons daar was,was dit bitter warm en kurkdroog en die rooi sandduine was amper kaal.Hierdie keer was dit ‘n totale verrassing…na genoeg somerreën,is die veld oortrek met gras en plante. Oral is blomme en nog enkele skoenlappers wat die naderende byt van die winter tot dusver oorleef het.

Die diere is vet en gesond en om elke draai staan troppe rooihartbeeste,springbokke en blouwildebeeste…om nie eers te praat van koning leeu en sy vrouens nie!

Ek skop af met my gunsteling dier…die stille atleet van die vlaktes.

IMG_7250_edited-1
Wat sien ek daar…seker weer ‘n boomstomp!
IMG_7276_edited-1
Toe nou nie!Die pragtige kat verskyn uit die gras.
IMG_7273_edited-1
Hy kom al nader,teen die middagson.
IMG_7268_edited-1
Die jagluiperd is die vinnigste landdier en kan ‘n spoed van tot 70 kilometer per uur handhaaf oor kort afstande.Honderd kilometer per uur is ook al gemeet!
IMG_7278_edited-1
Hier is hy in sy volle glorie…die mooiste kat op aarde!

(Hierdie blog is veral vir Hanneliese en Wolfie).

 

Perdeby gaan…


IMG_7887
Okavangohelikoptertjie.

IMG_7405_edited-1

IMG_0602

IMG_2702_edited-2

IMG_9820

 

IMG_3766b
Nuuskierige kolkatjie.
IMG_1388
Klein ssskatjie!

Ek gaan ‘n rukkie laaglê…’n paar van my gunsteling foto’s…mooibly tot ek terug is.

 

 

 

Langnekke van die Kgalagadi

IMG_8120
Dagbreek ..Daybreak.
IMG_1334b
‘n Rare gesig…a Journey of giraffe!
IMG_8079
‘n Lekker mondjie water…
IMG_8087
Lek die lippies af.
_MG_7795b
Die einde van nog ‘n dag…
_MG_7811
Skemertrio.
_MG_7827
Koester die laaste hitte van die wegkwynende son.
IMG_1345
Sommer ‘n pretfoto..liefde in die Kgalagadi.

Droogte…

is ‘n hartseerding!Suidelike Afrika is in die wurggreep van ‘n erge droogte en ons as stadsmense kom dit nie werklik agter nie.Ons koop steeds ons stukkie vleis en groente in die winkel,drink ons bier,wyn en melk en is salig onbewus van die werklike erns van die saak.

Waar dit werklik op die been sny en mens tot besinning skud,is wanneer jy by die wildeperde van die Namib ‘n draai maak.Hier is oorlewing ‘n felle stryd.Tans is daar glo net 160 oor en in die laaste drie jaar het geen vulletjies oorleef nie.Die hienas slaan ook toe en vreet die verswakte perde.

Daar is vrywilligers wat help om die perde van voer te voorsien,asook ‘n fonds waar mens geld kan skenk.

Ons was vier jaar gelede daar en ek het al oor die perde geblog.Ek plaas weer foto’s vir my nuwe blogvriende.

_B0O3927b_B0O4286b_B0O4257bIMG_3873_B0O4138b_B0O4058b_B0O3973b_B0O4024b_B0O4020b_B0O4064b

Hierdie pragtige diere,wat vir baie jare die woestyn kon troef,is tans in groot moeilikheid!

Lees gerus die verhaal van die perde hier: https://perdebytjie.wordpress.com/2012/01/20/die-wildeperde-van-die-namib/

 

‘n Briefie in ‘n ou boekrak.

Gister breek ons die ou boekrak in ons TVkamer uit.Ons woon al 30 jaar in hierdie huis en het die huis gekoop met die einste rak.Dus is dit omtrent al veertig jaar oud.Daar was ‘n effense oomblik van hartseer en nostalgie,maar die vooruitsig op meer ruimte en iets nuuts,het my gou opgebeur!

Nadat die hele spul uitgebreek is en die stof effens gaan lê het,sien ek ‘n opgevoude papiertjie tussen die splinters en hout lê.

Ek herken dadelik die skrif as dié van my middelste dogter,toe sy klein was.Ek lees en die trane rol sommer….sy is duisende kilometers van hier af in ‘n vreemde land,maar ‘n vergete briefie van ‘n langvervloë kindertyd het haar vir ‘n oomblik styf teen my aangedruk…

image
Dié briefie het nou ‘n ereplekkie tussen al my kinders se “kunswerkies” en skryfgoedjies van lankgelede!

Surprise se storie gaan verder.

Dis langnaweek en Gogo het vir Surprise kleertjies ingepak,want hy gaan Sekunda toe na sy sjebien-ouma.Eintlik gaan sy ma daar kuier,maar sy moet hom saamvat,anders vind die spul familie dáár uit,dat hy by Gogo bly.Die gort sal gaar wees,want hulle sal seker weer begin toutrek oor die kind en eis vir”damages”!

Hy loer met bang hartseer ogies na Gogo,maar sy praat hom moed in en sê hy moet doodstil bly oor waar hy nou woon.Sy ma is aangetrek soos ‘n modepop en haar lang rooigeverfde naels tik ongeduldig op die kind se kop.

Tot dusver het sy niks bygedra tot Surprise se versorging of opvoeding nie.Haar enigste blykie van die kind se bestaan,was toe sy verlede jaar,fyn uitgevat,by die kleuterskool opgerol het vir Surprise se “graduation”!Natuurlik pryk sy op ‘n foto saam met hom,met sy skinkbordkeppie,swart manteltjie en spierwit glimlag.Mens sou sweer sy het betaal vir sy vier jare in die creche.Sy het hom miskien tweemaal gesien,nooit gebel nie en nie eers geluk gewens met sy verjaarsdag nie!

Madame het nou werk gekry,maar weereens word Surprise net gebruik om haar kant skoon te hou by haar suiplap familie.Met afkeuring kyk sy na die kind se goedkoop Pepstore tekkies en gooi ‘n skimp dat sy pa vir die kind Nikes moet koop!Gogo sluk ‘n bytende opmerking weg en plant vir oulaas ‘n soentjie op Surprise se blinkbruin voorkoppie.Sy krimp ineen net by die blote gedagte aan wat vir die kind voorlê.

Die naweek snel verby,maar nie vinnig genoeg vir die getraumatiseerde kind nie.Maandagmiddag,hoor Gogo ‘n kind buitekant haar huis huil.Hemel,dis Surprise!Mammielief het hom net daar afgegooi,nie eers toegesien dat hy veilig ingaan,óf die familie kom groet,wat háár kind koester en grootmaak nie…eish!

Die outjie is omgekrap en vertel van suipery en sjebiengevegte en hoe sy gekletterde ouma ‘n ander ewe dronk oompie rondgegooi het….natuurlik met bygaande skellery en vloekwoorde.Die mannetjie is die heelmiddag ongedurig en spring op en af soos ‘n kaartmannetjie.Gogo se tienerseun bring die knapie naderhand tot bedaring en lei sy aandag af van die naweek se vieslikhede.

Mêrrimpie het nog steeds Surprise se “grant”kaart en Gogo moet maar op haar eie voortsukkel om die bondeltjie “surprise” wat ses jaar gelede sy opwagting gemaak het,te versorg!

NS. As jy dalk nie die verhaal voorheen gevolg het nie,lees Surprise se storie hier: https://perdebytjie.wordpress.com/2015/08/04/die-storie-begin-so/ en hier: https://perdebytjie.wordpress.com/2015/08/05/die-storie-gaan-verder/ en hier: https://perdebytjie.wordpress.com/2015/08/06/die-storie-gaan-nog-verder en hier:https://perdebytjie.wordpress.com/2015/08/07/die-storie-gaan-nog-verder-en-verder-en/ en ten slotte hier: https://perdebytjie.wordpress.com/2015/08/07/die-storie-eindig-so/