Twee uiterstes

Tot verlede Woensdag was dit nog krimpkoud hier in Swakopmund.Die ysige suidewind het oor die koue Benguelaseestroom   getier en ons in jasse en serpe ingedwing!Soggens was die vensters toegewasem en misvingers het klewerig aan alles geklou.

Dagbreek op Donderdag maak ons die gordyne oop,geen wasem,geen mis,geen nattigheid!Toe weet ons …hy is hier…Oompie Ooswind!Eers het hy stadigies sy lui-warm asem oor alles begin blaas,net om ons mak te maak vir wat kom.Teen die middag buig die palmbome om,die meeue stoei teen die wind en die lug is een groot rooi stofbal!

Die hitte wat van die woestyn af walm,brand die neusgate,dring deur die digste vensters en laat mens en dier soos afkop-hoenders rondlê.Stof dring deur alles en elke happie kos het ‘n lagie natuur bo-op.Dit help nie om te vee nie,die stof warrel net in die lug op om dan jou neusgate te verstop en jou met niesbuie en erge sinus te laat.

Die heerlikste van Oosweer,is die ongelooflike laatmiddae en aande,waar mens in die middel van die winter tot laat ‘n doppie kan kap langs ‘n braaivleisvuurtjie.Dan het die wind gaan lê en net ‘n salige louwarmte bly oor.

Ek het al voorheen hierdie verskynsel verduidelik,maar doen dit weereens vir my nuwe lesers:Wanneer dit baie koud word in die binneland,vorm daar ‘n aflandige trog van lug,wat dan oor die warm woestyn afsak,ontaard in ‘n dor warm wind en in die proses stof en sand saamwaai,wat dan uiteindelik in die Atlantiese oseaan beland.Dit kan ‘n week tot twee weke aanhou.

Duidelike tekens..die branders sukkel teen die Oostewind en die misbank lê diep agter oor die see!

Laatmiddag..al wat leef en beef loop op die strand rond en sommige dapperes waag dit in die ysige water!

Skielik wemel dit van die sportiewes,wat die heerlike weer benut.

Tandem na sononder.

Stofwolk oor die oseaan,sorg vir ‘n pragtige oranje sonsondergang.

Die temperatuur is tans net 31 grade C..beter as gister se 34!Teken dat die weer begin draai na “normaal”!