Anderkant van die wêreld (8)

Die volgende dag spoeg die boot ons uit op die hawe van Whittier…

IMG_0381

IMG_0385

Dis ‘n dorpie waar omtrent al die inwoners (ongeveer 218) onder een dak in een veertien verdieping gebou woon. Dis ‘n ou

weermagbarak wat dateer uit 1956.

In die gebou, bekend as Begich Towers, is ‘n polisiestasie, burgermeester se kantoor,  kliniek, kerk, winkel en wassery. Daar is ook ‘n klein hotel, konferensiekamer en speelplek met ‘n binnenshuise swembad in die gebou.

(google images)

Daar is nog ‘n groot gebou, wat in 1953 deur die weermag opgerig is, maar dis toegemaak en staan verlate..nogal spookagtig! Dit was eens op ‘n tyd die grootste gebou in Alaska…

(google images)

Die enigste manier om by hierdie “Town Under One Roof” te kom, is per boot of deur ‘n ses kilometerlange eenrigting treintonnel vanaf die binneland. Die ingang van die tonnel, waar mens baie lank wag, want ‘n trein moet daardeur en ook voertuie van die anderkant af. Dis uitstekend georganiseer en werk met ‘n robotstelsel en bane vir verskillende soorte voertuie.

IMG_0402

In die winter val omtrent 6,35m sneeu en heers winde van 96 km per uur! Die weer is so verskriklik,dat die kinders deur ‘n tonnel vanaf die Begich Towers, skool toe moet pendel.

Die tonnel gee mens ‘n kwaai gevoel van bedruktheid en ek was maar te bly toe die lig voor in die tonnel verskyn!!

IMG_0406

Hiervandaan ry ons deur pragtige landskappe na Anchorage…

IMG_0434

waar ons die fotografiegroep, waarmee ons wildernis toe gaan, ontmoet.

Ons verken Anchorage en eet lekker saam met ou vriende van ‘n vorige toer..

IMG_0439

Anchorage is maar ‘n valerige plek, maar die omgewing is asemrowend mooi. Uitsig uit ons hotelkamer…

IMG_0418

Word vervolg…

Anderkant van die wêreld (7)

Ons laaste dag op die boot verras ons met pragtonele oral om ons…

IMG_9436

_MG_7415

_MG_7412

_MG_7401

_MG_7400

As mens dink Glacier Bay is asemrowend, dan is jy heeltemal verstom vir wat in College Fjord wag! Ons word deur ‘n lootsboot die fjord in begelei.

_MG_7376

‘n Fjord is ‘n lang smal inham met hoë sykante of kranse, wat gevorm is deur gletsererosie.

_MG_7486

Daar is sestien gletsers hier en elkeen is vernoem na ‘n kollege in die V.S.A.

_MG_7423

Die gletsers aan die regterkant van die fjord, is vernoem na dameskolleges en links is die manskolleges.

_MG_7499

Die grootste gletser, in die middel, is natuurlik  vernoem na Harvard, dié prestige universiteit in V.S.A.

IMG_9442

_MG_7513

IMG_9479

Dis die eerste sonskyndag tydens ons toer en dit sorg vir asemrowende kleure in wit en blou…

IMG_9445

 

 

Word vervolg…

 

Anderkant van die wêreld (6)

Die volgende dag vaar ons Glacier Bay binne. Slegs twee passasiersskepe word per dag hier toegelaat. ‘n Boot met Parkeraad amptenare ontmoet ons by die ingang van die baai. ‘n Groepie van hulle klim op die passasiersboot en bly heeldag hier, om te vertel van die omgewing en vrae te beantwoord..

_MG_7111

Die Glacier Bay National Park and Preserve bestaan uit 12,950 vierkante kilometer van woude, water, en berge wat meer as 4,572 meter hoog verrys…

_MG_7240

_MG_7245Groot riviere van ys wat van die hoogtes af skuif tot in die melkerige groen baai, sorg vir die naam van hierdie skouspelagtige plek…

IMG_9381

Soos wat ons dieper die baai invaar, word drywende ysstukke orals opgemerk..

_MG_7196

_MG_7190

_MG_7172

_MG_7151

Daar is sewe gletsers, insluitende die Margerie Glacier, een van die mees gefotografeerde gletsers. Dis ook een van Alaska se aktiefste gletsers…daar is gedurig ‘n oorverdowende harde geknetter, soos wat die ys kraak en skuif en dan met ‘n donderslag in die water stort…

IMG_9373

Hierdie gletser is veertig verdiepings hoog (76,2 meter) en meer as 3 kilometers wyd…

IMG_9359

Onder die water ‘n verdere dertig meter!

_MG_7220

Die baai is uitgekalwe deur ‘n gletser en omtrent 308 meter diep…

IMG_9402

Nog gletsers…

_MG_7228

_MG_7214

_MG_7289

Die Grand Pacific Glacier is baie vuil as gevolg van sneeu- en rotsstortings en grond wat uit die valleibodem geskuur is…

_MG_7309

My gunsteling…

_MG_7268

Nog ‘n verklaring vir die blou ys: Wanneer lig die hoogs gekompakteerde ys raak, word langgolflengte kleure (rooies) geabsorbeer en die kortgolflengte kleure (bloues),  weerkaats…

_MG_7294

Nog tonele in die baai…

_MG_7253

Na ‘n fantastiese dag, vertrek die Parkeraad amptenare weer op hul bootjie…

_MG_7324

Word vervolg..

 

Anderkant van die wêreld (5)

Na ‘n baie steil rit berg-op, bereik ons twee spanne opgewonde blaffende brakke. Die lawaai is oorverdowend en hulle rem en trek aan hul leisels in pure afwagting…

_MG_6988

In die somer word die honde op ‘n hoë hoogte aangehou, omdat hulle maklik oorverhit. Om hulle fiks te hou, word toeriste op karretjies rondgesleep en duidelik is dit vir hierdie werksesels pure genot. Hier is ons halfpad en die langtonge neem net gou ‘n blaaskansie…

_MG_7018

Daar is gewoonlik 16 honde in ‘n span en dit word heel wetenskaplik uitgewerk watter een waar moet trek. Die tewe is ligter en blykbaar vinniger, terwyl die reuns meer in kragposisies ingespan word. Die hondehanteerder, genoem ‘n Musher, staan agter op die karretjie en skreeu bevele uit wanneer die honde van rigting moet verander. Uiteindelik is ons terug by die beginpunt…

_MG_7035

Nou is dit tyd vir waterdrink…

_MG_7037

_MG_7036

en sommerso in die waterbak slaap…

_MG_7064

Besoekers word aangemoedig om interaksie met die diere te hê, want hulle is saggeaarde, baie sosiale wesens. Hier het ek my kans waargeneem en ‘n hele paar foto’s van enkelinge geneem…

_MG_7063

Soos julle kan sien, lyk hierdie honde nie soos die pragtige Siberiese Huskies, wat mens in die flieks sien nie! Hulle is allerhande kleure en groottes en hulle is nie ‘n suiwer erkende ras nie. Die diere is geteel uit verskeie noordelike rasse bestaande uit  werkshonde, herdershonde, pointers en Salukis, om die beste, vinnigste sleehond te kry…

_MG_7047

Tewe weeg 17 tot 19 kg en die reuns 21 tot 25 kg. Dus is hulle slank en lig, gebou vir spoed…

_MG_7043

Hulle is allerhande kleure…

_MG_7046

die pels is kort tot medium lank, want die dier moet maklik hitte kan vrystel, tydens lang hardloopsessies..

_MG_7040

Soms het hulle verskillende kleure oë en blou is nogal algemeen. Die leier van die trop met sy pragtige onpaar oë…

_MG_7056

Terug by die basis, gaan ons na die Musher kamp en daar vertel ‘n vrou wat al jare met die honde werk, vir ons allerhande interessanthede van wedrenne, hondeteling en die hele kultuur rondom die sleehonde…

_MG_7077

Die slee is piepklein en lig. Die Musher sit en slaap sommer op die slee tydens ‘n wedren. Die honde is so slim, dat hulle self kan aanvoel waar die ys te dun is en waar gevaar dreig.Sy vertel dat sy al menigmaal die dood ontduik het, deurdat die honde se instink die gevaar uitwys…

_MG_7080

Die bekendste sleereisies ter wêreld, is die Iditarod Trail Sled Dog Race. Dit geskied vanaf vroeg Maart vanaf Settler’s Bay na Nome. Dit duur van agt tot vyftien dae of langer, in uiterste omstandighede. Die kwik daal soms tot -73 grade C! Al om die ander jaar word ‘n suidelike en dan weer noordelike roete gevolg, om die impak op die gemeenskappe langs die roete te beperk.Die noordelike roete is 1,569 km  en die suidelike roete 1,606 km lank.

Lees verder hier:https://en.wikipedia.org/wiki/Iditarod_Trail_Sled_Dog_Race

By die Musherkamp is daar ook ‘n telery en die musher vertel breedvoerig watter eienskappe sy in hondjies soek…

_MG_7087

Nadat ek bietjie opgelees het oor die sleewedren en die stres waardeur die honde gaan, is ek nie meer seker of dit nie ‘n uiters wrede kultuur is, waar diere uitgebuit word vir menslike ego en geld nie. Maak jou eie gevolgtrekking..

IMG_0292

Word vervolg…

Anderkant van die wêreld (4)

Toe ek die volgende oggend wakker skrik, is dit die gesig wat my begroet…

IMG_0260

Die boot staan styf vasgemeer teen ‘n loodregte krans met al hierdie “kunswerke” van reisigers uit die onlangse verlede…(Op die boonste foto is ‘n verfsel van ons skippie, wat ook hier aangedoen het in 1994, met ene Kaptein Knight aan die stuur.)

Op die beknopte hawekant staan reeds ‘n trein en etlike busse gereed om passasiers na verskillende interessante bestemmings te vervoer…

IMG_0259

Die dorpie se naam is Skagway. Dis in 1897 gestig en lê in ‘n smal gletservallei in die Alaska “panhandle”, negentig myl noordwes van Juneau. Met ‘n inwonertal van 1,036 mense, is dit piepklein. In die somermaande is daar meer inwoners om die toeristebedryf aan die gang te hou. Daar was ook ‘n goudstormloop in die laat agtienhonderds. Die meeste van die dorp is gerestoureer en lyk soos in die dae van die goudstormloop. Op ‘n stadium was daar tagtig kroeë en natuurlik ‘n berugte bordeel, die Red Onion Saloon,wat vandag nog daar is…

(Google Images)

Een van die tipiese straatjies met ou hout geboue…

IMG_0270

Die volgende geboutjie is in 1899 gebou van dryfhout…die enigste voorbeeld van Alaska-dryfhout-argitektuur. Dis bekend as die Arctic Brotherhood Hall…

IMG_0271

Ons neem ‘n bustoer uit die dorp uit, na ‘n afgeleë plek in die berge, waar ons vandag die beroemde sleehondbedryf van Alaska gaan leer ken…

IMG_0291

Die voertuig waarmee ons teen steil hoogtes gaan uitry om by die honde te kom, staan reeds gereed…

IMG_0282

 

Word vervolg…

Anderkant van die wêreld (3)

Die Misty Fjords wildernisgebied is in 1978 tot Nasionale Monument verklaar.Die inheemse stamme soos die Tlingit, Haida en Tsimshian het duisende jare al hier geleef.

Die dennevlaktes, beboste berghange, rotsstrande en soutmoerasse vorm ‘n besonderse Suidoostelike Alaska ekosisteem. Dreunende watervalle stort orals van die skuinstes af…

_MG_6801

_MG_6785

Volop reën en sneeu op die bergpieke, voed rivierstrome, waarheen salmvisse jaarliks in massas migreer om eiers te lê en dan te sterf…

IMG_0275

Die volgende dag vaar ons die hawe van Juneau binne.Dis die hoofstad van Alaska en is in 1880 as ‘n goudmyn kamp begin. Die inwonertal is ongeveer 32,660 mense. Dis die enigste hoofstad in die V.S.A. wat nie per pad bereik kan word nie.Op die foto kan mens sien hoekom nie…

IMG_0230

Die wandelpad langs die hawe is pragtig versier met kleurvolle kunswerke aan die lamppale…

IMG_0238

Ons gaan weereens op ‘n bootrit om walvisse te sien en later na ‘n pragtige gletser…

_MG_6963

Dit staan bekend as die Mendellgletser. Die blou kleur in die ys, word veroorsaak wanneer sneeu op ‘n gletser val, saamgepers raak en deel word van die gletser. Lugborrels word uitgedruk en yskristalle vergroot om dan die ys blou te laat vertoon.

_MG_6968

Word vervolg..

 

 

 

 

 

 

 

 

Anderkant van die wêreld (2)

Die tweede dag vaar ons meestal op die oop see,maar met pragtige natuurtonele oral…

_MG_6709

Dag drie vaar ons vroegoggend die hawe van Ketchikan, binne. Dit staan bekend as Alaska se “First City”, want dis die eerste plek waar reisigers aandoen oppad na die noorde.

IMG_0178

Die naam kom van die Tlingit woord “Kitschk-Hin”,  wat “dreunende vlerke van ‘n arend”, beteken. Dis na aanleiding van die buitelyne van die Ketchikan Creek, soos van bo-af gesien.

19% van die inwoners is van Tlinglit, Haida en Tsimshian inheemse Alaskaanse afkoms.

IMG_0187

‘n Oorvloed aan salm het die Tlinglit mense hier laat vestig en in 1883 het ene “Snow” die eerste salmsoutery ge-open en dit was die begin van die vissersdorpie.

In die laat 19de eeu is goud en koper ontdek en die dorp het floreer en die houtindustrie is ook gevestig. Dis vandag Alaska se sewende grootste stad met 8,142 inwoners en saam met bewoners van omliggende streke, is daar 13,686 siele.

Ons gaan op ‘n bootvaart in die Misty Fjords Nasionale Monument:

IMG_0226

Dis ‘n ongelooflike waterwêreld met boggelrugwalvisse…

_MG_6936

_MG_6938

Robbe…

_MG_6885

en fantastiese natuurtonele!

IMG_9308

New Eddystone Rock duik op uit die newels. Dit bestaan uit basalt wat uit ‘n vulkaniese pyp deur krake in die bodem van die Behm Kanaal, verrys het. Gletsers het oor miljoene jare die meeste van die lawa weggeskuur en net die rots het agtergebly…

_MG_6747

Vir ‘n oomblik breek die eina-sonnetjie deur en sorg vir ‘n gouelig foto van die anderkant af…

_MG_6764

Ons vaar verby geheimsinnige gletsers, gehul in mistigheid…

_MG_6871

Word vervolg…

 

 

 

 

 

Anderkant van die wêreld

Vir Perdeby van sonnige Suid-Afrika, was dit ‘n lewenservaring om ‘n maand gelede na die anderkant van die wêreld te vlieg. Die verandering in klimaat, lugdruk en bo alles, die tien ure tydsverskil, het sy tol geëis, maar dit was deur-en -deur die moeite werd!

My vlerkies het my op ‘n reis na die skone Alaska geneem en in die volgende paar aflewerings deel ek my wonderlike ervaring met my bloglesers.

Vanaf pragtige Vancouver is ons met die Island Princess op ‘n sewe dae reis noordwaarts.

IMG_0134

IMG_9290

IMG_0152

Word vervolg…