Oppad…SAAO en SALT

As mens by Sutherland kom, ry jy nie verby voordat jy nie eers ‘n draai op daardie hoë heuwel tien kilometer buite die dorp gemaak het nie. Dis 1770 meter bo seevlak en met die helderste, donker hemelruim, is dit een van die beste plekke op aarde vir astronomiese waarnemings…

Die plat area op die berg is bespikkel met verskeie lande se teleskope en dit herinner aan ‘n buiteruimtelike toneel. Daar is ten minste sestien teleskope van lande soos Suid-Afrika, Nederland, Brittanje, Duitsland, Japan, Rusland, VSA, Pole en Korea. Hierdie is maar net enkeles…

Dié 1.9m teleskoop was jare lank die grootste een in SA, maar het verouder geraak vanweë die beperkte vermoë om lig te versamel…

Die verouderde teleskoop van naby…

Een van die ander groot teleskope word hier gehuisves…

Die hoogtepunt is natuurlik die SALT (South African Large Telescope). Hy pryk soos ‘n indrukwekkende ikoon tussen al die ander en kan al van vêr af gesien word…

Bouwerk het in 2000, in samewerking met internasionale rolspelers, ‘n aanvang geneem en is in 2005 voltooi. Dis die grootste optiese teleskoop in die suidelike halfrond met ‘n versameling seshoekige spieëls wat seshoekig versprei is oor ‘n afstand van elf meters…

Besoekers staan in ‘n glashok en bibber van die koue, want die temperatuur moet konstant baie koel gehou word om die spieëls nie aan te veel temperatuurwisseling bloot te stel nie.

Diagram wat die prentjie duideliker maak…

Die seshoekige hoofspieël bestaan uit 91 seshoekige spieëls, wat rondgeskuif kan word. Elke spieël is een meter wyd en weeg omtrent 100 kilogram. Soms moet van die spieëls verwyder word vir ‘n skoonmaakproses wat tot drie ure kan duur. Dit word glo met droë ys gedoen.

Duitsland, Indië, Nieu-Seeland, Pole, Suid-Afrika, Brittanje en VSA is almal vennote in hierdie merkwaardige skepping. Voorwaar ‘n besoek werd!!

SAAO (South African Astronomical Observatory) is welbekend vir die studie van ons twee naaste sterrestelsels…die Wolkies van Magellaan.

Nog inligting kan gevind word by http://www.saao.ac.za  of  http://www.salt.ac.za