Operasie boomsnoei.

Per regulasie is sypaadjiebome munisipale eiendom en mag die gewone burger nie daaraan raak nie. Ons bome is dertig jaar laas nog tydens die ou bedeling gesnoei. Intussen het ‘n paar bure self die ou bome getakel, maar ons is wetsgehoorsame burgers en het die regte weë gevolg, om die nou gevaarlike boom op ons sypaadjie te laat snoei. Die hemelhoë boom vol dooie takke, kon enige oomblik in ons erf val, met groot skade aan ons tronkheining en huis. Ook was voertuie en voetgangers op straat in gevaar.

So het die boom gelyk…dit hel gevaarlik oor en die stam onder is lelik gekraak…

Na verskeie aanmeldings, taaknommers, foonoproepe en beproefde geduld, daag die span drie weke later!! hier op…sewe van hulle met ‘n vragmotor en bakkie…

Daar word summier gesê die vragmotor moet op die grasperk op die sypaadjie getrek word, ten spyte van my protes en verwysing na die hysbak wat gemaklik kan bykom as die vragmotor in die straat geparkeer bly…

Die gevolg is ‘n helse sloot, waarvan ek nie ‘n foto geneem het nie, want ek was te kwaad. Tuinman het die hele volgende dag gewerk om die gat op te vul en die gras te herstel.

Eerstens word die droë takke met ‘n saag op ‘n lang stok, gesny…

Intussen klim twee manne in die hysbak en posisioneer hulself strategies…

Mens sien net takke waai…

Die groot petrolsaag word nou nader getrek…

Intussen saag die grondspan die takke op en laai dit op ‘n bakkie.Die groot blarerige takke word deur ‘n kloubekhyskraan op die vragmotor gelaai…

Binne twee ure is die takie afgehandel en dis die eindproduk, wat my laat op en af spring van loutere vreugde! Uitsig van my huis af…

Prentjie van die straat af…

Die boom is steeds vol dooie takke en hulle kon dit netsowel gelos het. Ek het klaar iemand gehuur om nou op eie koste die gemors reg te maak! Let op die dooie boom aan die oorkant, links…

Toe ek vra hulle moet dit ook snoei, is daar vir my gesê daardie huiseienaar moet dit aanmeld. Ek dag dis munisipale bome en hulle verantwoordelikheid!

Wel ek gee nou nie ‘n duiwel om nie, hierdie munisipale eiendom gaan ek self uitsorteer, al word ek aangekla van “defacing of government property”!

(Let op, geen veiligheidsklere of helms op die kop nie!)