Rhebusfontein se sirkus ontaard in ‘n regte sirkus!

Hierdie is ‘n pretblog deur ‘n paar bloggers en die skakel is hier https://fresh.inlinkz.com/p/556868f82eae403d9143258e74ee97b1

Na ‘n suksesvolle openingsaand, wat erg formeel was vir ‘n sirkus, word die tent in gereedheid gebring vir ‘n spesiale vertoning vir alle Rhebusfonteiners en hul aanhangsels.

Dis ‘n gewerskaf om alles reg te kry. Op die oog af lyk dit na ‘n rustige prentjie, veral waar die olifante op die dorpsmeent langs die reuse tent, rustig smul aan maroelas van die takke van Vuurvliegie se maroelaboom, wat oor die heining hang. Hierdie vretery gaan nou al vir ‘n paar dae lank aan en niemand het enige erg daaraan nie. Inteendeel, sirkusbaas P.T. Barnum, is maar te bly, want dis ‘n besparing op kos vir hierdie reuse diere.

Die son sak en vol afwagting streep die inwoners en hul aanhangsels, na die imposante sirkustent. Una, met haar kat, Kieter, oor haar skouer gedrapeer soos ‘n nertsstola, klou aan Danie, die bulhond en Cheeky, die keffende Chihuahua, se leibande. Hulle het haar omtrent heelnag wakker gehou van opgewondenheid oor die sirkusvertoning.

Scrapy se Trompiehond is ook aan ‘n leiband, maar hy neem haar op sleeptou en tot haar verleentheid pirts-pirts hy sulke strale teen elke tentpaal en stoelpoot in sig. Bloedrooi van skaamte, met Porky-uil klouend aan haar skouer, vind sy darem ‘n sitplek waar Trompie bietjie uit die oog is.

Camilla, geklee in ‘n styfpassende katpak, wat die nodige kurwes beklemtoon, hang liefies aan Lorenzo se arm. Die man lyk erg verleë as sy kort-kort giggel en aan sy oorlob knibbel. Die twee duifies neem stelling in op die sagte stoele teen die arena. Camilla skuif styf teen Lorenzo se gespierde arm aan en leun haar kop koketterig op sy skouer.

Toortsie, Elané, Sonell, Hester, Trommeltjies en Perdebytjie het geen aanhangsels en sit rustig en knaag aan springmielies uit reuse kartonhouers. Nou en dan is daar slurpgeluide soos wat een van die ses behaaglik suig aan pienk koeldrank uit plastiekkoppies.

‘n Brullende Harley Davidson stop in ‘n stofwolk reg langs die tent en ‘n hupse Tannie Frannie wip rats tot op die grond. In haar hand het sy ‘n mandjie met broodrolletjies, wat heerlik warm gebroei word deur Lelik, haar baie lelike kat.

Positief vat hier en daar grond soos Billy Bok haar met sy horings op haar agterent klits.Gelukkig kry sy hom tot bedaring met een van die warm gebroeide broodjies uit Frannie se mandjie en kan hulle sitplekke inneem op die harde houtbankies agterlangs.

Virgo se kat, Floki, blaas en sis as sy vir Bondels met Pasella, die papegaai raaksien. Sy besluit om liewer naby die ingang te staan met Floki in haar arms. Vuurvliegie doen haar bes om Ringo, die pratende Schnauzer, se gebabbel te laat bedaar. Sy dreig dat sy een van Harpy, die Reuse-ooruil, se vere in sy keelgat gaan afdruk.

Woordnoot sit eenkant, vêr van almal af en kou heerlik aan ‘n baie lewendige stuk bloukaas. Sy is hierdeur verseker van ‘n hele blok sitplekke net vir haarself. Laastens kom Christa en haar drie brakkies, BB, Sobek en Shilo ewe ordentlik aangetrippel.

Skielik is daar ‘n geroffel van tromme, die lug is vol van die geur van springmielies en strooi, die spanning laai op…

Die tentflap lig, die orkes begin speel en onder luide applous beur die groot grys lywe van vier olifante deur die nou tentopening. Die hanteerder klap sy sweep en die stomme reuse stap gehoorsaam na hul klein stoeltjies, waarop hulle gaan sit.Die musiek word al hoe harder en werk op na ‘n hoogtepunt. Weer klap die sweep en die vier olifante gaan staan gelyk op hul voorpote met hul reuse agterstewes in die lug.

Skielik is daar ‘n viervoudige trompetgeskal…’n stortbui van halfgegisde maroelas trek die hele tent vol. Orals is daar gille en chaos. Kartonne vol springmielies, halfgedrinkte plastiekglase met koeldrank en louwarm gebroeide broodrolle trek deur die lug , soos wat almal spaander om gelyk by die tentopeninge uit te kom.

Leibande verstrengel inmekaar soos die klomp viervoetiges hakskene klap buitetoe. Die paar katte skreeu soos maer varke en hol met oopgesperde naels die berge in. Die geveerdes hap na die gegisde maroelas en sluk dit soos knoppe weg…heel tevrede oor hierdie skielike manna uit die hemel. Billy Bok hardloop in ‘n tentpaal vas en hol met ‘n gedeelte van ‘n stuk seil gespan oor sy horings, ook die berge in.

Skielik is alles stikdonker. P.T. Barnum trek ‘n vuurhoutjie en ‘n helse ontploffing laat die tent in ligte laaie.Gegisdemaroelagaswalms uit vier olifante is ‘n goeie bron van energie en het net ‘n klein vonkie nodig.

Gelukkig het geen dier of mens seergekry nie, maar die tent is tot as verbrand….

(Vuurvliegie sal die diere en geveerdes gaan troos in die grot waar hulle verskrik wegkruip).