Kletskouse

Ek was gister hoogs geïrriteerd,want twee kletskouse het amper my senuwees geknak.Ek is seker almal van ons ken sulke mense of is dalk self een!

Ek het al agter winkelrakke weggekruip,wanneer ek sommige mense sien aankom.By my oefenklas is ‘n vrou,met wie ek liewers nie eers oogkontak moet maak nie,want sy pen my vas en dan voel dit of ek voor ‘n vuurpeleton beland het,soos sy my skiet met die woorde.

Dan is daar die een wat in my spasie kom en naderhand is ek teen ‘n muur gedruk soos ek agteruit tree om van die spoegreën te ontsnap.

Ek haat dit om op ‘n foon te sit en klets en dit laat sommer my ore hang wanneer party mense bel.Soms sit ek met die foon armlengte van my oor af en sê so nou en dan “ja” en hoop dis op die regte plekke!Eintlik hoef ‘n mens nie daaroor bekommerd te wees nie,want die standaard kletskous kom dit nie eers agter nie!

Die ergste kletskous is die een wat onophoudelik vertel van sy of haar wonderlike kinders,wat so voortreflik en suksesvol is en na jare nog nie eers weet wat jóú kinders se name is nie.Dis dan gewoonlik ook diegene wat vertel van hul nuutste aanbouings,vier-by-vier en volgende oorsese trippie,asof dit standaardpraktyk is.

Sekerlik die irriterendste persoon,is die een wat ‘n hele geselskap oorneem en later sit almal met sulke glasige oë voor hulle en uitstaar.Ek het al geleer om heeltemal af te skakel en nog steeds na die persoon te kyk en te lyk of ek vreeslik aandagtig luister.Intussen verkeer ek op ‘n ander planeet!

Ek hoop nie ek het nou met my geklets op iemand se tone getrap nie!  

Advertisements

Nog foto’s

Spoortjies in die sand.

Afgebrand,met ‘n anderster skoonheid!Tsondabvallei,nadat weerlig die veld aan

die brand geslaan het.

Spoor van die duinmol.Hy swem letterlik deur die sand!

Bossies op rooi duine.

Sonsondergang..Tsondab.

Vragmotor steeds in werkende toestand.Tsondabvallei.

Steenbokskeerkring in Nauklooft Nasionale park

Dorslandfoto’s

Die afgelope drie jaar is ons besig om Namibië van hoek tot kant te deurkruis. Hierdie droë land het soveel aantrekkingskrag vir ons, dat ons besig is om elke pad, onder ons “wa” se wiele probeer inwerk. Dis ongelooflik bevredigend en die kameras kliek heeltyd.

Ons was al by fantastiese plekke, waar min mense kom.Ons basis is Swakopmund en vandaar het ons nou al verskeie paaie Noorde toe gevolg en Desember is ons af Suide toe tot by Lüderitz.Ons het vreeslik gery en sowat sesduisend kilometers afgestof!

Hierdie reise is vreeslik bevredigend, want ‘n mens is die heeltyd met jouself en mekaar gekonfronteer en daar is geen afleiding soos rekenaars, nuus, TV en al die ander kommunikasiemiddele, wat jou heeltyd bombardeer met negatiwiteit nie!Vir vyf weke was ek salig onbewus van wat daar “buite” aangaan.Noudat ek terug is, besef ek, ek het NIKS gemis nie! 

Homeb, blyplek van die Toppenaars. Dis in die Kuisebrivier in die Nauklooft Nasionale Park.

Homeb

Grasveld in die Nauklooft.. jy sien sewe dae in die toekoms in!

    

Tsondabvallei…gasteplaas net noord van Solitaire

Die volgende drie foto’s is almal op Tsondab geneem.

Laaste huldeblyk

Pa, Oupa, ons het jou vanoggend gegroet. Die afgelope drie weke was aaklig, maar nou is jy rustig waar jy hoort..weg van pyn en ellende.

Jy was ‘n wonderlike mens en toe jou seuns en kleinkinders vanoggend aan jou hulde gebring het, het die verlies van Pa weer diep in my hart ingesny!

Nog nooit het ek kleinkinders gesien, wat so hartseer oor ‘n oupa is nie. Hulle rou snikke het my totaal uitgeboul. Die herinneringe wat hulle opgehaal het, het almal se harte geroer.

Ek is bly ek kon vir Pa die stukkie voorlees wat ek dieselfde nag net na Pa se afsterwe geskryf het. Dit was baie moeilik, maar nadat dit verby was, het ek so verlig gevoel en rustig geraak oor alles.

Nou lê die leegheid voor en Kersdag sal ons Pa se vrolike laggie mis. Gelukkig verstaan ons dat tyd die wonde genees, maar die herinneringe sal vir ewig bly.

Liefde,

Jou skoondogter, wat eintlik jou dogter was.

‘n Seder het geval

Vir ons as familie, was hy soos ‘n sederboom, sterk, regop,reikend na bo, met oopgespreide arms, wat almal altyd in sy liefde omvou het!

Ek sit nou slapeloos hier en bepeins die lewe en dood van my pragtige skoonpa.Hy is presies om middernag oorlede. Ons het gejaag om betyds te wees, maar was te laat.Dis eintlik ‘n verligting, want hy het nou vir amper drie weke wanhopig geklou aan die lewe.

Al was hy negentig,is dit steeds ‘n groot verlies vir ons..’n era is vir ewig verby. Ons sal nooit meer sy laggie hoor nie. Ons sal nooit meer saam met hom stap om na sy tuintjie, waarop hy so trots was, te gaan kyk nie.Ons sal hom nooit meer uitgevat sien in sy hemp, das en baadjie nie. Hy was so lief om mooi aan te trek.Ek sal nooit meer vir hom klavier speel nie.Ons sal nooit meer sy leuse, “werk maak sterk”,uit sy mond hoor nie. Dit sal net ‘n familieherinnering bly!Hy sal nooit weer sy hand diep in sy sak steek om vir ‘n arme ‘n geldjie te gee nie.Hy sal nooit meer die motordeur vir my oopmaak nie. Hy was een van die min jintelmanne wat ook sou terugstaan dat ‘n vrou eerste by die deur ingaan.

Gelukkig het hy die laaste drie maande van sy lewe, verskeie hoogtepunte beleef. Manlief het hom geneem om op die Gautrein te ry, hom vir oulaas Marievale toe geneem om voëls te gaan kyk. Sterk is die prentjie nog, toe hy daardie skemeroggend met sy sweetpak aan en sy verkykertjie reggestaan het vir die oplaai! Hy het ook ‘n paar honderd Bybels namens die Gideons by verskeie skole uitgedeel.Die week voor hy siek geword het, het hy nog sy tuintjie reggeruk vir die nuwe seisoen.

Nou is dit net die bergwagters,duiwe en langstertjies wat elke dag vergeefs kos kom soek. Ja, die bakkie met beenmeel en saadjies is vir ewig leeg…

My hart voel soos hierdie bakkie, maar ek weet as die smart en hartseer verby is, sal die bakkie weer vol word van die goeie herinneringe aan ‘n baie besonderse mens!

Rus sag, Pa, Oupa…

Ek tjank nou die sleutelbord nat!

Is die blogs in werlikheid ‘n hoekie vir eensames?

Ek wonder nou al lank hieroor. Wanneer ek alleen voel, kom kuier ek hier. Ek hoef nie alleen te wees nie, maar as daar geen sinvolle gesprekke met ander mense kan plaasvind nie, is ek hier!

Hier val niemand my in die rede nie. Hier moet ek luister na ‘n ander ou, sonder dat ek my eie storie sit en uitdink,terwyl ek met glasoge na die verteller staar!Hoeveel van ons beleef dit nie daagliks in ‘n geselskap nie? Mense is nie regtig meer geïnteresseerd in wat ‘n ander te sê het nie.As jou opinie hemelwyd van iemand s’n verskil, is die kanse op ‘n bekgeveg en doodskreeuery ook groot.

Hier kan ek my mening lug en almal kan verby of ‘n paar stekelrige aanmerkings maak, wat ek nie persoonlik opneem nie.Ek word gedwing om ander se griffels te lees en daaroor te dink. Geskrifte gee ‘n mens ‘n baie regverdiger kans om jou eie opinie te vorm. Gladdebekke en mense wat op hul voete kan dink, kry altyd die oorhand in ‘n gesprek.

Hier is die speelveld gelyk en die stadige perdebye onder ons kan ons tyd neem om stekies uit te deel!

kim

writer, reader, naturelover, conservationist

Slaai Sonder Blare

Alle kopiereg behoort aan Chantelle de Wet

Something Over Tea

Scribbles from my notebook

dawn2dawn photography

Tall Tales From The Field

Perdebytjie se nes

'n Blog oor die natuur en allerdaagse gebeure,wat die lewe interessant maak

for the birds (mostly)

Some amateur photography...no hammers here

My Seep Kis

Hier waar ek my weird en wonderful wereld met vreemdes kan deel sonder judgement.

Woestynkind

Die wandelende opinie

Travels and Trifles

Expressing Thought Through Photography

if all else fails...use a hammer

an exercise in percussive maintenance

Storieklong

Want stories

Lekkervurigeaffêre

Sommer oor alles wat my hart warm laat klop.

Wegkruipplek

Dis hier waar ek kan skryf wat ek wil

Figuram Lumina

Thom Verleg

Voz Sola

Veselglas & Plastic

verFilmies

Verfilming, kameras, opinies...

Krummels & Katkuite

Afrikaanse gedagtes gemeng met siel en cursive woorde.

THEO HERBOTS FOTO- EN VIDEO-BLOG

FOTO'S, VIDEO'S EN ALLE BELANGRIJKE INFORMATIE OVER #TIENEN YOU CAN TRANSLATE 🗣🇧🇪 THIS BLOG IN 110 LANGUAGES BELOW ⬇️👇⬇️👇⬇️👇

%d bloggers like this: