Die Brandberg se geheim!

Vandag stap ons verder die berg in. Al raak dit warm,demp dit nie ons opgewondenheid oor die pragtonele om elke draai nie.

Ons kameras klik en klik,ons skiet en skiet soos die San jagters van ouds,maar met heel ander instrumente en heel ander motiewe!

Blouselblou lug met veerwolkies..

Dieselfde toneel, veranderd soos die son agter die wattebolletjies uitskuif..

 

Granietblokke met ‘n boom wat in ‘n skeur veg om oorlewing..

 

Uiteindelik! Een van die tekeninge..’n gemsbok met sy lang horings..

Sien jy al die wit dame?

Ja,hier is sy uiteindelik,met geen definitiewe proporsies van vroulikheid nie!

Sy is toe al die tyd ‘n hy!

.

Ongelukkig is sy/hy baie verdof vanweë sotlike onkundiges wat gedurig water op haar/hom gespuit het om die kleure beter te laat uitkom! Vandag mag mens nie eers ‘n koeldrank daar naby bring nie en die gidse hou mens fyn dop.

Ek vertel volgende keer meer oor die oorsprong van die naam en wat die hedendaagse bevindings aangaande hierdie interessante tekening is.

Advertisements

Pandemonium

Gisteraand was daar al gerugte van ‘n skelm gedierte hier in ons woonbuurt.Gedagtig aan tokkelossies en allerhande bygelowe, het skeptiese ekke maar net gewonder of iemand nie sy ou sokkies gerook het nie!

Vanoggend sê die hekwag vir my, dat hy Kees se kind in ons straat gesien het.Later sien ek hoe ons buurtwagmotor op en af ry..sonder sukses.Buite in die straat is al die tuinmanne besig om blare te hark,sypaadjies netjies te maak en aan die oor en weer gepratery oor ‘n vyfhonderd meter afstand,kan mens hoor hier is groot opgewondenheid!

Ek hang ook daar rond en probeer agter die kap van die byl kom.Dit lag en gesels en beduie en dis so ‘n lekkerte dat ons almal saamgesnoer is deur so ‘n stuk sensasie.Ek het laas so gevoel by die stembus in 1994!Elkeen beduie..een dink dis die apie met die Pampersdoeke,wat hier onder in die straat as troeteldier aangehou word.Nog een wys hoe hoog kees is..en dis skrikwekkend!My huishulp vra vir my of dit daardie diere is wat mense namaak(sjimpansees)en ek pluk my wildtuin diereboek uit om vir haar ‘n prentjie te wys.

Intussen het ek my kamera gereed om my nek..net ingeval!Lang storie kort,tuinman gil vir my Ta is op ons dak.Ek is net betyds om sy lang grys sekelstert te sien,toe is hy weer vort.Huishulp gil hy sit agter op ons houtheining vir haar en kyk!Weer is ek te laat en Adoons verdwyn soos ‘n groot speld.Ons hang oor die bure se mure en almal praat gelyk.Orals is natuurlik net huishulpe en tuiniers.Ek is die enigste wit gesiggie,maar ons is saamgebind in die oomblik!

Die geheimsinnige besoeker is nog steeds soek en diep in my hart hoop ek dat hy nie ‘n tragiese einde tegemoet gaan loop nie!

Ek het lanklaas ‘n oggend so geniet!

Brandberg

Hierdie ongelooflike fassinerende berg lê soos ‘n reuse grys klip in ‘n baie dor Namibiese landskap.Dis ‘n berg wat heeltemal los staan van ander berge in die omgewing en van ver af lyk dit ontsettend ongenaakbaar.

Noord van die Brandberg lê rant op skurwe rant en reusagtige berge toegevou in ‘n warm wasigheid.

Wanneer ‘n mens die Brandberg binnestap,is dit met stomme verbasing..dit is ‘n hele ekosisteem op sy eie en na vanjaar se baie reën is daar selfs spruitjies en hoë riete en biesies.Dit lyk soos ‘n bosveldparadys!

‘n Mens stap amper ‘n uur saam met ‘n gids om na die beroemde “White Lady” rotstekening te gaan kyk.Dis ‘n argeologiese bewaringsgebied en niemand word toegelaat sonder ‘n gids nie.Oppad speel die volgende tonele af.. 

‘n Wandelpad vol verrassings..

‘n Witgatboom staan teen die blouselblou lug..

‘n Klip wat soos ‘n bobbejaan se kop lyk..

‘n Dassie in die vroegoggend son..

Die berg se mooiste geheim wag..tot volgende keer!

Tandarts toe!

Ek het só opgesien teen vandag,want ek moes gaan vir ‘n kroon.Eers tagtig rand neersit,want dis mos nou deesdae die in-ding by dokters en tandartse.Jy kan dit darem eis by jou medies,maar Dokter moet darem ook ‘n ou inkomstetjie hê as die medies bietjie lank vat..heeltemal verstaanbaar!

Gelukkig wag ek nie te lank nie,het een van daardie tandartse wat ‘n meester in tydsbestuur is.Dis hoekom ek al dertig jaar by hom is.Ander kwakke kan gerus by hom kom lesse neem!

Nou ja,ek syg half onwillig in die stoel neer en die assistent knip al die nodige fieterjasies om my nek vas en daar kom hy in,gemasker en met sy inspuiting al mikkend na my brose tandvleise.Voor my geestesoog sien ek weer daai advertensie van Vodacom,waar die veearts,’n ou bewerige omie,met dik toegewasemde brilglase, met ‘n massiewe perdespuit die ou in sy boud wil klits!

Weereens,goeie tandarts,rêrig nie seer nie,maar ai tog,die blote gedagte aan daardie liederlike naald!Lang storie kort..dit boor met allerhande groottes bore en intussen versuip ek halfpad.Meeste van die bore spuit mos water ook uit en die assistent verwring my lip met ‘n liederlike suigbuis wat kort-kort ‘n mangel ook halfpad afruk!Baie fatalisties dink ek..dis nou sommer twee vir die prys van een!

Nou is dit blou bytgoed en warm byewas en ek weet nie wat nog alles wat in my beleërde, oopgesperde mond ingedruk word.Ek dink juis by my sigselwers dat my vel hoeka nie meer so elasties soos twintig jaar gelede is nie en voor my geestesoog sien ek hoe hang my wang nou vir ewig skeef!Ek het juis so ‘n stryd teen die ouderdom,sonder dat dit nog kunsmatig aangebring hoef te word!

Terwyl die dik boor,so voel dit vir my, tot in my harsingspan dril,probeer ek aan ander goed dink en wonder hoekom tandartse nie teen hul plafonne allerhande oulike prentjies kan plak,waarna die stomme pasiënte kan kyk nie.Al wat ek teen dié dak sien,is drie plat ligte met stowwerige motkarkasse van baie somers gelede.Ek lê maar en tel hoeveel daar is en lees tot satwordens toe die naam van die spreilig wat selfs my brekfis en ek weet nie wat nog nie, verhelder!

Na amper ‘n uur,kom die marteling tot ‘n einde en moet ek my uitgerafelde mond uitspoel.Probeer dít nou doen as al jou gesigspiere lam is..die water druil gewoon by my mondhoek uit en ewe verleë wuif ek my martelaar vaarwel.

Ag,ons het deurentyd darem baie lekker gesels,hy ‘n monoloog en ek vingertaal en ‘n’n! en eee! op die regte plekke.

Tandartse het eintlik ‘n baie eensame lewe..hulle kan met niemand ‘n ordentlike gesprek voer nie.Hul pasiënte staar alewig daktoe met ‘n mondvol tande!   

Dinges

“Dinges” is so ‘n lekker woord,veral as mens vergeetagtig raak.Hierdie ou woordjie kom soms handig te pas.

Dink daaraan as jy iemand se naam vergeet.Dan is dit sommer “Dinges Watsenaam”.Wanneer ek kwaad is en ek kan nie sê ek is die m@..r in nie (vanweë die geselskap waarin ek my bevind),dan is “de dinges in” net so lekker om te gebruik.

Vergeet jy wat jy wou sê,dan is “ag dinges,jy weet mos” ook goed genoeg vir die toehoorder!

“Wat de donner” kan ook versag word met “wat de dinges”.

Nou ja,voor ek meegevoer raak met dinges praat,laat ek gou vir my ‘n dingestoebroodjie vir middagete maak voordat die Dr.Dinges Show op die dinges begin.

Life according to C

To become remarkable, hold yourself accountable

wolfshadowwhispers

'n venster na 'n ander wêreld

'n Skrywer se blok

Kortverhale, gedigte en sommer enigiets met die lewe te doen.

Perdebytjie se nes

'n Blog oor die natuur en allerdaagse gebeure,wat die lewe interessant maak

Emy's Blog

Blog for Commenting Elsewhere...

kim

writer, reader, naturelover, conservationist

Slaai Sonder Blare

Alle kopiereg behoort aan Chantelle de Wet

Something Over Tea

Scribbles from my notebook

dawn2dawn photography

Tall Tales From The Field

for the birds (mostly)

Some amateur photography...no hammers here

My Seep Kis

Hier waar ek my weird en wonderful wereld met vreemdes kan deel sonder judgement.

Woestynkind

Die wandelende opinie

Travels and Trifles

Expressing Thought Through Photography

if all else fails...use a hammer

an exercise in percussive maintenance

Storieklong

Want stories

Lekkervurigeaffêre

Sommer oor alles wat my hart warm laat klop.

Wegkruipplek

Dis hier waar ek kan skryf wat ek wil

%d bloggers like this: