Verdere verwikkelinge met die bytjies..

Maandagmiddag, ‘n week nadat die nes omgeval het, is daar skielik ‘n verskriklike gezoem en die hele agtertuin is vol vlieënde bye. Hulle vlieg in sirkels al bokant die swembad. Mens en dier vlug binnetoe en al die vensters word toegemaak. Vreemd genoeg was hulle nie agressief nie en na omtrent ‘n uur, groepeer hulle in ‘n struik, omtrent vyf meter van hul nes af…Daar sit hulle nou al die afgelope vier dae, rustig en geensins kwaai of agressief nie. Af en toe vlieg een of twee op, maar gaan onmiddelik weer sit in die bondel.

My nuuskierige geaardheid laat my wonder wat aangaan. Weereens gewapen met my tuisgemaakte byepak…lig ek die voëlbadjie se badgedeelte van die stam af en sien dat daar nie meer ‘n enkele by in die nes is nie.

By nadere ondersoek,word die raaisel van die vlugtende bye stelselmatig opgelos. Let wel, ek weet niks van bye af nie en dis slegs my eie waarnemings:

Van die heuningkoeke is pikswart en daar is weinig heuning in..

Kommerwekkend is die groot dele wat heeltemal gemuf is…

Hier en daar is ‘n dooie by en enkele larwes, wat spartel om weg te kom van my ondersoekende hande…

Ek het die ou nesmaakplek skoongemaak en wonder nou of die swerm gaan terugtrek. Intussen sit hulle steeds saamgekoek in die struik langs die swembad.

Af en toe val een in die water en dan red ek hulle van gewisse verdrinking.Hulle is verbasend taai. Al lyk hulle morsdood, ontwaak hulle wonderbaarlik, daar op die warm bakstene langs die swembad. Na ‘n halfuur van lyf- en vlerkpoetsery met hul voetjies, styg hulle een vir een op en dáár gaan die gelukkiges.

Ek het dit toevallig waargeneem, nadat ek ‘n spul dooie bye met die skepnet uit die swembad gehaal het. Van die hele spul was daar later net omtrent drie wat dit nie gemaak het nie.Die res het stelselmatig ontwaak en weer gevlieg.

Nou is die reddingspan kort-kort daar met die net en kyk in verwondering hoe die “dooies” ontwaak en wegvlieg.

As iemand wat my blog lees, iets van bye af weet, sal ek graag ‘n mening wil hê van wat hier gebeur het.