Ek verlang sommer vandag….

na mooi oop landskappe en sonsondergange,met die wind wat weemoedig deur klipskeure en oop vlaktes huil.Dit bring so ‘n lekker soort hartseer in my.

Didi en Dexter

Dexter die Airedaleterrier is soms ‘n regte terreur! Hy spesialiseer daarin om kouse in te sluk en het al ‘n paar keer obstruksies gehad.Eenkeer het hy ‘n sosatie ingesluk,wat sjirurgies verwyder moes word,want die stokkie het deur sy maagwand gesteek.Mens kon die knop by sy ribbes voel.Duur spulletjie gewees. Deesdae is hy baie kalmer.

Didi is ‘n engel.Sy speel so mooi met ons kleinseuntjie,natuurlik altyd onder streng toesig.Die kind kry vroeg al die geleentheid om te leer hoe om teenoor diere op te tree.

‘n Amarilla vir Ma

Liefste Mammie

Ma sou vandag vyf-en-negentig jaar oud geword het.Al is Ma al elf jaar weg,voel dit nog steeds soos gister toe ons moes totsiens se.Dis nie meer seer nie,maar die herinneringe aan ‘n wonderlike mens,bring steeds ‘n knop in my keel.

Deesdae gaan my gedagtes baie ver terug en ek beleef weer my skooldae.Ek en Ma was so na aan mekaar.Ek onthou nog hoe Ma my altyd moed ingepraat het ,deur moeilike hormoonbelaaide tienerjare,by my gestaan het toe ek soms radeloos gesukkel was met studies,my raadgegee het met my eie kinders se opvoeding.Ek wil nog soms die foon oplig en Ma vertel van goeie dinge wat met my gebeur,spog met ons kleinseuntjie,Ma gerusstel dat al die kleinkinders hul plekkies in die lewe gevind het…

Buite onder die grasdak,staan Ma se pot met Amarillas,wat ek hierheen gebring het,toe ons Ma se huisie leeggemaak het.Twaalf jaar al,elke lente,stoot die knoppe uit geilgroen blare en kelk uit in die mooiste blomme.Hierdie jaar is hul prag besonders en ek het dertien knoppe getel.Van gister af is daar agt oop.Liefste Ma,dis spesiaal vir mammie….

Aaaa,hier…..

het ek jou!!!

Neotropic Cormorant lyk net soos ons rietduiker.In die Pantanal sien mens gereeld hoe visse gevang word.Dit bly egter moeilik om ‘n goeie foto te kry,want dit gebeur so vinnig!

Gooi die vissie bietjie rond sodat dit lekker sag is vir die afsluk.

Nog ‘n bietjie knibbel,vir die finale sagte afglip in die keel!

Nog geveerdes van die Pantanal.

Witoog parkiet…lawaaierig en kom voor in swerms.

Groot Kiskadee..is ‘n tipe vlieevanger.Eet insekte,vrugte,akkedisse en slange,maar sal ook in water duik agter vis aan.

Vermilion vlieevanger vang insekte en sit gereeld iewers in die oopte vanwaar hy sy jagtogte loods.

Yellow-chevroned Parakeet..lyk soos die budgies wat mense in hokke aanhou.Dit was wonderlik om hulle vry in die natuur te sien!

Saterdagpret…spesiaal vir Dirkie!

Dis die japon wat ek in gedagte het,wanneer Dirkie skryf van die vrou in die hoekhuis met haar oorgrote japon.

My kleinseuntjie is ‘n jaar oud!

 

Liefste Dylan…

Vrydag ‘n jaar gelede,is jy en my kleinseuntjie op dieselfde dag gebore.Ek en jou ouma was saam verheug oor ons pragtige babatjies.Ons het uitgesien daarna om julle vordering dop te hou,soos wat julle groei en ontwikkel.Ons wou julle saam parkie toe stoot in jul waentjies en julle onder die bome laat lê om te kyk vir die voëltjies en die blou lug,saam met julle uitsien na eerste dae op kleuterskool,skool en al die dingetjies wat ‘n ouma saam met haar kleinkind doen.

Dinge het egter anders uitgewerk.Drie dae na jou geboorte het jy meningitis opgedoen.Dae van louter hel het op jou en jou ouers gewag.Party dae het jy tot dertig stuiptrekkings gekry.Jy was heeltyd op sterk medikasie en soms net ‘n verwese stil bondeltjie in jou hospitaalbed.Die beste neuroloë en pediaters het alles probeer.Vir omtrent vier maande het dit goed gegaan en dit het gelyk of jy vordering maak.

Toe loop alles weer verkeerd,liefste seuntjie.Daar was die een terugslag na die ander en eindelik moes ‘n ventilator jou help asemhaal.Vanoggend is die masjiene afgeskakel en jou moeë liggaampie het die stryd gewonne gegee.

My kleinseuntjie sal na die voëltjies en die blou lug kyk en weet daar was ‘n  ander seuntjie wat dolgraag dieselfde sou wou doen.

Rus sag,liewe Dylan…..

Een,twee,drie en…..aksie!

Swartaasvoël wat bad.

Swartaasvoëls besig om ‘n kaaimankarkas te vreet.

Picazuroduif,verjaag die ander voëls.

Jabiru ooievaar,maak gereed om te vlieg.

Uiteindelik kom die sware lyf in die lug.

Ringed Kingfisher,vang ‘n vissie.

Die vere maak …

wel die voël!Die ou wat hierdie spreekwoord uitgedink het,het beslis van mense gepraat en nie van voëls nie.In die Pantanal het ek die volgende besondere geveerdes met my kamera geskiet:

Die pragtige Hyacinth Macaw,wat wêreldwyd skandelik as kouvoël aangehou word!Hulle is uiters bedreigd.Dit was fantasties om hulle in die natuur te sien.Dis die wêreld se grootste papegaai.

Hulle woon in holtes in bome.In die Pantanal is daar ‘n groot bewuswording van hierdie geveerdes se waarde en baie grondeienaars wend pogings aan om hulle te beskerm.

Die Guira Koekoek lyk op sy beste soos ‘n “punk rocker”!

Windverwaaid!

Die Southern Crested Caracara leef grotendeels van aas en word dikwels saam met aasvoëls opgemerk.

 

Die Toco Toekan is my gunsteling.Met sy reusagtige snawel,is dit omtrent ‘n fees om hom te sien.