Kersfees lê voor en nou gaan ek bietjie rus. Ek sal die fotogalery in die nuwejaar hervat.
D staan vir diere, voëls en inwoners van die Okavango. Dis seker een van die wonderlikste mooiste plekke in die wêreld. Woorde en foto’s kan dit nie beskryf nie..
D staan vir De Hoop Natuurreservaat, geleë drie uur vanaf Kaapstad in die Overbergdistrik. Dis ongeveer 340 vierkante kilometer groot en is die tuiste van 86 soogdierspesies. Dit sluit elande, Kaapse Bergzebras grysribbokke, geelmuishonde, bobbejane en die hoogs bedreigde bontebok in. Daar is ook ‘n pragtige vlei, waar baie voëlspesies aangetref word.
Die De Hoop Marine Beskermde Area strek tot drie seemyle vanaf die kuslyn. Die baai is die teelplek van die Suidelike noorkapperwalvis en op ‘n helder dag kan mens gelukkig wees om hulle te sien vanaf ‘n hoë duin.
D staan ook vir Die Hel oftewel Gamkaskloof. Dis ‘n afgesonderde vallei omtrent 20 kilometers lank en 600 meter wyd. Dis in die Swartbergreeks. Die naam is afgelei van helling of hel, wat meer te doene het met die styl helling waarteen die pad in die smal kloof afgaan, as met die spreekwoordelike Hel. Dis nogal ‘n uitdagende rit met die pad wat teen ongeveer 579 meters afdaal na die vallei.
Op 28 November 2019, was daar ‘n verskriklike brand wat ‘n groot deel van die vallei verwoes het. Van ver af kan mens die ontsettende verwoesting sien, wat soos ‘n pikswart letsel uitstrek .
Oppad soontoe is daar pragtonele van fynbos, blomme en ander besondere plantegroei en selfs klipspringers.
Aan die anderkant van die kloof is Die Leer…’n baie styl pad waarmee die inwoners vroeër jare plaasprodukte uitgeneem het en ander noodsaaklikhede teruggebring het. ‘n Mens kan slegs daar kom met ‘n 4×4 of ‘n fiets en die pad gaan oor ‘n deel van Bosch Luys Kloof Privaat Natuurreservaat.
D staan vir Damaraland. Dis ‘n streek in die noordweste van Namibië. Dit strek vanaf die Brandberg tot by die klein dorpie Sesfontein. Dis ‘n gebied met asemrowende natuurtonele, ruwe gebergtes, tafelagtige berge, ongelooflike rotsformasies.
Dis ook die tuiste van woestynolifante, renosters, woestynleeus, zebras, volstruise en verskeie boksoorte. Reuse droë rivierlope, soos die Ugab, Huab, Uniab en Huanib, verskaf groenigheid vir die diere. Hierdie riviere kan in siedende watermassas verander as dit reën en het al menige kampeerders sleg verras.
Die paar foto’s wat ek plaas gee nie werklik die ruwe natuurskoon weer nie. Mens moet self daar wees om dit te beleef.
Terug by ‘n B wat ek oorgeslaan het….B staan vir Bloedkopje in die Namib-Naukluft Park in die wonderskone Namibië.Die Naukluftpark beslaan 49,768 vierkante kilometer en is die vierde grootste nasionale park in die wêreld en die grootste in Afrika.
Bloedkopje is naby Swakopmund en ons het ‘n hele nag daar spandeer om die regte lig vir perfekte foto’s te kry. Op ‘n stadium was alles bedek onder ‘n mismantel. Daar is geen geriewe nie en dis net jy, die stilte, jou tent, jou eie water en kos…lekker primitief!
B staan vir Brandberg…dis die hoogste berg in Namibië nl. 2573m. Van buite lyk dit soos ‘n dorre berg wat daar lê, maar wanneer ‘n mens daar instap, is dit ‘n ander wêreld wat voor jou oopvou, met plantegroei en water..natuurlik as dit ‘n natterige seisoen is. Die beroemde “White Lady” rotsskildery word hier aangetref en mens mag alleenlik met ‘n gids soontoe stap. Die skildery is al heelwat verniel en is nie meer mooi sigbaar nie.
B staan vir Balule, privaat boskamp in die Krugerwildtuin.
Die afgelope paar jaar bespreek my susterskind die hele kamp uit en dan is daar ‘n saamtrek van familie en vriende. Dis een van die hoogtepunte van kuier en saamwees in die plek waarvoor ons die liefste is.
Die slegte tyd waardeur ons almal die afgelope twee jaar is, het my lus ontneem vir baie dinge. Ek het besluit dis nou pure bogtery en vir myself ‘n uitdaging gestel. Ek het in my foto-argief gaan rondkrap en al my mooiste foto’s uitgesoek. Ek begin vandag by A en dit staan vir Alaska. Daar gaan geen byskrifte wees nie, net die mooi om te geniet….