Winkeltjies

Afrikawinkeltjies het vir my so ‘n kinderlike eenvoud,waaroor ek mal is.Daar is geen opgesmuktheid,deftigheid,aansitterigheid of geite aan sulke plekke nie.Dis basies,mens koop nog oor ‘n toonbank en jy vat wat jy kan kry.Die kreatiwiteit met eenvoudige goed,soos ‘n blik pienk of rooi verf,riete,tou en draad,sorg soms vir die oulikste winkels.Gooi daarby nog ‘n paar bome,honde en skroppende werfhoendertjies in en jy het die perfekte atmosfeer!

‘n Paar winkeltjies wat ek in Caprivi,Namibië afgeneem het:

Die laaste strale van die son.

‘n Buffeltrop is rustig aan’t wei in die soet gras van die Nkasa Rupara Park.Die son trek al water en net die gekou van vele tande,versteur die skemerstilte.Dis ‘n magiese oomblik.Af en toe proes een van hierdie Afrika-grotes en ‘n sagte gebulk is nou en dan hoorbaar.

Stofwolke slaan uit teen die skemerson,soos die trop stelselmatig vorentoe wei.Dis ‘n onbeskryflike gevoel om so te sit tussen hierdie diere…net jy,jou gedagtes en die verstomming aan iets groots!

Dan kom die oomblik…hulle beweeg voor die sakkende son verby en dis die prentjie:

Spinnekop tragedie

Arme spinnekoppie is verlam deur die steek van ‘n perdeby.Tans word sy binnenshuis versorg deur Perdebytjie.Elke dag word haar lam beentjies versigtig heen en weer gewikkel,sodat hulle nie styf word nie.Sy kry ook ‘n druppeltjie water in haar mond met ‘n druppertjie.Hopelik sal die gif oor ‘n paar weke uit haar sisteem wees,of genadedood sal dalk die beste wees.

Ek het ‘n rukkie gelede gelees van ‘n bobejaanspinnekop wat dieselfde oorgekom het en toe so behandel is totdat sy herstel het.

Hierdie is ‘n Reënspinnekop (Palystes superciliosus) en sy lê my handpalm vol…voorwaar ‘n pragtige skepseltjie!‘n Spinnekopwesp geklassifiseer as Pompilidae,jag spinnekoppe,verlam dit en sleep die ongelukkige spinnekop na sy nes,waar hy  ‘n eier op die spinnekop se abdomen lê en die nes verseël.Die larwe wat later uitbroei voed dan op die steeds lewendige verlamde agtpotige,totdat hy alles verorber het.Daarna spin dit ‘n kokon en verskyn later as volwasse perdeby.

In hierdie geval het die wesp ‘n vroeë dood gesterf,nadat hy my tuinier verwoed aangeval het en dié hom die ewigheid in geklap het.Ongelukkig het hy toe alreeds die spinnekop verlam.

Die natuur is baie wreed!